«Кадрлық резервте тұрды»: Ержан Сәденов өзінің орынбасарына қатысты дауға нүкте қойды
Оны тағайындау шешімі алдын ала қабылданған
Ішкі істер министрі Ержан Сәденов Сенат отырысының кулуарында өзінің бірінші орынбасары Бауыржан Әленовке қатысты пікір білдірді, деп хабарлайды Azattyq Rýhy.
Министрге кулуарда журналистер Талғарда болған оқиғаға қатысты жауап беретін өңірдің полиция бастығы ІІМ-нің бірінші орынбасары болып тағайындалуына қатысты сұрақ қойды.
«Бізде кадрлық резерв деген түсінік бар. Бір қылмыс бойынша шешім шығаруға болмайды. Оны ұсыну бойынша шешім алдын ала қабылданған болатын. Жалпы ол қылмыстың толық ашылуына жауапты болатын. Бізде резервтік жүйе бар. Ол резервте тұрған соң осындай шешім қабылданды. Тергеуді тергеуші жүргізіп жатыр. Ол жағдай бойынша жетекшілік етті. Қазір менің бақылауыммен жедел тергеу тобы құрылды. Іс бойынша барлық жағдай бақылауда», - дейді ол.
Естеріңізге салайық, 4 қазан күні Талғар қаласында төбелес болып, 16 жастағы Шерзат Полат кісі қолынан қаза тапты. Көп ұзамай марқұмның отбасы тұратын үй өртеніп кетті. Құқық қорғау органдары бөтеннің мүлкін қасақана өртеу фактісі бойынша қылмыстық іс қозғалғанын хабарлады. Ал Бауыржан Әленов ішкі істер министрінің бірінші орынбасары болып 7 қазанда тағайындалды.
