Жастарға жасалған қолдау – еліміздің болашағына жасалған инвестиция, дейді депутат
Мәжіліс депатуты, «AMANAT» партиясы фракциясының мүшесі Асхат Аймағамбетов «Болашақ» бағдарламасы арқылы халықаралық олимпиадалар мен ғылыми жобалардың жеңімпаздары тиісті талаптарға сай келген жағдайда бакалавриат бойынша оқи алатынын айтты, деп хабарлайды Azattyq Rýhy.
Ол өз сөзінде осы туралы толығырақ түсіндіріп берді.
«Жұмыс тобының отырысында біз халықаралық олимпиадалар мен ғылыми жобалар жеңімпаздарын қолдау туралы норманы қабылдадық. Бұл өте маңызды түзетуіміз: енді халықаралық олимпиадалар мен ғылыми жобалар байқауларының жеңімпаздары «Болашақ» бағдарламасы аясындағы тиісті талаптарға сәйкес келсе, бакалавриат деңгейінде білім ала алады.
Бұған дейін «Болашақ» тек магистратура және докторантура деңгейіндегі оқуды қаржыландыратын. Бұл өз алдына дұрыс шешім болғанымен, халықаралық олимпиадалар жеңімпаздарына қатысты мәселе туындайтын еді.
Әлемдік жетекші университеттер бұл талантты балаларға бірден бакалавриатқа гранттар ұсынатын, сол себепті олар шетелге кетіп қалатын. Сол кезеңде біз оларға дәл осындай қолдау көрсете алмадық, сондықтан оларды жиі жоғалтып отырдық. Көпшілігі шетелде оқумен қатар, сол жақта тұрақтап қалып жатты. Осындай балаларға мемлекеттік бюджет есебінен грант беру – маңызды қадам», - дейді Асхат Аймағамбетов.
Депутат сөзін жалғай отырып, білімді жастарға қолдау көрсету – елімізге жасалған инвестиция екенін айрықша атап өтті.
«Сәйкесінше, енді «Болашақ» бағдарламасы ең дарынды оқушылар үшін бакалавриаттан бастап қолжетімді болады. Бұл – жас таланттарды қолдап, оларды елде ұстауға мүмкіндік беретін маңызды жаңашылдық. Олар әлемнің үздік жоғары оқу орындарында білім алып, кейін елге оралып, Қазақстанның дамуына өз үлестерін қосады.
Дарынды балаларды қолдау – олардың болашағына салынған инвестиция ғана емес, бұл Қазақстанның дамуына бағытталған стратегиялық қадам», - деді «AMANAT» партиясы фракциясының мүшесі Асхат Аймағамбетов.