«Шатыр опырылып, екі адам қайтыс болды»: Астанада құрылыс компаниясының директоры сотталды

Астана қаласының қылмыстық істер жөніндегі ауданаралық соты құрылыс компаниясының директоры М.-ға қатысты үкім шығарды. Ол абайсызда екі адамның өліміне әкелген құрылыс жұмыстары кезінде қауіпсіздік ережелерін бұзды деп айыпталды, деп хабарлайды Azattyq Rýhy қалалық соттың баспасөз қызметіне сілтеме жасап.

Сотталушы Қылмыстық кодекстің 277-бабының 3-бөлігі бойынша жауапқа тартылды.

Сот материалдарына сәйкес, компания директоры М. Астана қаласындағы ғимараттың қоймасын демонтаждау кезінде жұмысқа еңбек келісімдері жоқ адамдарды тартқан. Сонымен қатар, еңбек қауіпсіздігі мен еңбекті қорғау талаптарын орындамаған. Нәтижесінде, шатырдың опырылуы салдарынан абайсызда екі адам қайтыс болған.

Істі қарау барысында прокурор соттан сотталушыға 3 жылға құрылыс-монтаж саласында басшылық қызмет атқару құқығынан айыра отырып, 4 жылға бас бостандығынан айыруды сұрады. Сотталушы өз кінәсін толық мойындап, бас бостандығынан айырумен байланысты емес жаза тағайындауды өтінді. Жәбірленуші тараптың өкілдері де сотталушыға бас бостандығынан айыру жазасын қолданбауды сұрады. Сотталушының кінәсі мойындау айғақтарымен, куәлардың айғақтарымен және жазатайым оқиғаны тергеу актісімен дәлелденді.

«Жасалған қылмыстың мән-жайын және оның ауырлығын, жауаптылықты жеңілдететін мән-жайлардың болуын және ауырлататын мән-жайлардың жоқтығын, сондай-ақ жәбірленуші тараптың пікірін ескере отырып, сот М.-ны ҚК 277-бабының 3-бөлігімен кінәлі деп танып, 3 жыл мерзімге биіктікте құрылыс-монтаждау жұмыстары саласында басшылық лауазымдарды атқару құқығынан айыра отырып, 3 жыл 6 айға бас бостандығынан айыру түріндегі жаза тағайындады. Үкім заңды күшіне енген жоқ», - делінген хабарламада.