2025 жылы қалада 20-дан астам мектеп салынбақ
Астана әкімі Жеңіс Қасымбек Instagram парақшасында қалада жаңа мектептердің салынып жатқанын мәлімдеді. Сондай-ақ жыл соңына дейін тағы 9 мектеп ашуды жоспарланып отыр, деп хабарлайды Azattyq Rýhy қала басшысының әлеуметтік желідегі парақшасына сілтеме жасап.
«Мемлекет басшысының тапсырмасы бойынша елордада «Жайлы мектеп» ұлттық жобасы іске асырылып жатыр. Жоба аясында 2024-2025 жылдар аралығында жаңа форматтағы 24 мектеп салынады. Жыл соңына дейін ашылатын мектептерді ескерер болсақ, тапсырылатын жайлы мектептердің жалпы саны 17 болмақ», - деп жазды Жеңіс Қасымбек.
Биыл елордада қыркүйек айында 15 мектеп ашылған. Олардың тоғызы – «Жайлы мектеп» жобасы аясында. Белгілі болғандай жыл соңына дейін тағы 9 мектеп ашу жоспарда бар. Оның сегізі – ұлттық жоба аясында іске асырылмақ.
«Біз сол сияқты алдағы жылдарға да дайындалып отырмыз. 2025 жылы тағы 20-дан астам мектеп салып, пайдалануға беруді жоспарлап отырмыз. Оқу орындарының құрылысына жеке инвестициялар да тартамыз», - деп жазды елорда әкімі.