Елде су тасқыны қаупі сақталуы ықтимал
Ресми тұлғалар мәлімдегендей, тоқтаусыз жауған муссондық жаңбырлар мен өзендердің арнасынан шығуы салдарынан Бангладеште кемінде 20 адам қаза тауып, 5,2 миллионнан астам адам зардап шеккен, деп хабарлайды Azattyq Rýhy Reuters-ке сілтеме жасап.
Су тасқыны салдарынан көптеген адамдар оқшауланып, әсіресе жолдар жабылып, құтқару жұмыстарын және көмек көрсетуді қиындататын шалғай аудандарда азық-түлікке, таза суға, дәрі-дәрмекке және құрғақ киімге мұқтаж болып отыр.
Үкіметтің бас кеңесшісі Мохаммад Юнус телеүндеуінде әкімшілік су тасқынынан зардап шеккендердің қалыпты өмірге тезірек оралуын қамтамасыз ету үшін барлық қажетті шараларды қабылдағанын мәлімдеді.
Нобель сыйлығының лауреаты Юнус осы айда студенттер көтерілісі салдарынан бұрынғы премьер-министр Шейх Хасина елден қашып кеткеннен кейін ант берген уақытша үкіметті басқарады.
Бангладештің метеорологиялық басқармасы егер муссондық жаңбыр жалғаса берсе, су деңгейі өте баяу төмендейтіндіктен, су тасқыны сақталуы мүмкін деп ескертті.