«АМАNАТ» партиясының бастамасымен 2023 жылдың қаңтарында «Ауыл аманаты» жобасы іске қосылған болатын
ҚР Премьер-Министрінің орынбасары Тамара Дүйсенова Жамбыл облысында «Ауыл аманаты» бағдарламасының жүзеге асырылуымен танысты. Бұл туралы Azattyq Rýhy Үкіметтің баспасөз қызметіне сілтеме жасап хабарлайды.
Үкімет мәліметінше, былтыр Жамбыл облысы Байзақ ауданының 342 тұрғынына «Ауыл аманаты» жобасы аясында 2,1 млрд теңгеге 2,5%-бен жеңілдігі бар несие берілді. Бір жыл ішінде ауылдарда жаңа өндіріс орындары ашылды. Тамара Дүйсенова ауыл тұрғындарымен кездесіп, табысты жобалармен танысты.
Жалғызтөбе ауылының тұрғыны Ғанибек Жұмасаев бағдарлама бойынша алынған 6 млн теңге мөлшерінде жеңілдігі бар несие қаражатына кәсіби жабдықтар сатып алып, темір шатыр жабындарын, металл плиткалар, пішінде төсеніштер әзірлеуді қолға алған. Кәсіпкер өз өнімі үлкен сұранысқа ие болатынына сенімді: көршілес екі ауылда жеке тұрғын үй салуға 700-ден астам учаске бөлінген. Онда құрылыс жұмыс басталды және ауыл тұрғындары жергілікті өндірушіден шатыр жабынына тапсырыс бере алады.
Вице-премьерге автокөлік жуу, монша кешені, сұлулық салондары және басқа да нысандардың сәтті жүзеге асып жатқаны баяндалды. Тамара Дүйсенова іске асырылып жатқан жобаларға оң бағасын беріп, жергілікті тұрғындарды ауыл халқының өмір сүру деңгейін арттыруға бағытталған мемлекеттік бағдарламалар туралы хабардар етті. Бүгінде өз бизнесін ашқысы келетін жастардың жеңілдігі бар несие алуға мүмкіндігі мол, ал әлеуметтік осал санаттағы азаматтар үшін өтеусіз гранттар көзделгені атап өтілді.
Облыс әкімдігінде өткен отырыста «Ауыл аманаты» бағдарламасын насихаттау және халықтың бизнес-идеяларын қолдау бойынша жүргізіліп жатқан жұмыс туралы Жамбыл, Талас және Жуалы аудандарының әкімдері баяндады. Ақтөбе облысы Саржансай ауылдық округінің әкімі осы бағыттағы тәжірибесін бөлісті.
«Ауыл тұрғындарының әл-ауқатын арттыру – мемлекет дамуының кепілі. «Ауыл аманаты» жобасы әр өңірдің ерекшелігін ескере отырып, әр облыста іске асырылуда. Табысты жетістіктерін бөлісу және бағдарламаны жүзеге асырудың тиімді жағдайын кеңінен тарату маңызды. Ауыл әкімдері халыққа түсіндіру жұмыстарын белсенді жүргізуі тиіс», — деп атап өтті Тамара Дүйсенова.
Естеріңізге сала кетейік, мемлекет басшысы Қасым-Жомарт Тоқаев өз Жолдауында ауыл шаруашылығын дамыту, ауыл шаруашылығы өнімдерінің көлемі мен оның қосылған құнын арттыру, кооперативтерді дамыту стратегиялық міндет екенін атап өткен еді.
«Ауыл Аманаты» жобасының негізгі қаржыландыру бағыттары:
1) Өңдеу саласына қатысты жобалар;
2) Өсімдік шаруашылығын дамыту;
3) ауыл шаруашылығы коперативтерін жабдықтау;
4) мал шаруашылығын дамыту;
5) басқа бағыттағы бизнес жобалар;
Несиенің негізгі шарттары:
1) шағын несие мерзімі 5 жылға дейін; мал шаруашылығындағы жобалар үшін 7 жылға дейін;
2) шағын несиенің ең жоғарғы сомасы - ауылдық елді мекендер мен шағын қалаларда 2,5 АЕК, яғни (8.6 млн теңге), зәкірлік кооперация – шағын және орта шаруа (фермерлік) қожалықтары және/немесе ауыл шаруашылығы кооперативтері үшін 8 мың АЕК (27.6 млн теңге) дейін;
3) сыйақы мөлшері жылына 2.5 пайыздан аспайды;
Несие талаптары:
1) несие алушы жеке кәсіпкер ретінде тіркеуде болуы тиіс;
2) басқа несиелері бойынша мерзімі өткен жарналар болмауы керек;
3) Мемлекеттік кірістер органдарында берешек болмауы тиіс;
4) кепілмен қамтамасыз ету;
5) зейнет жасына жетпеген;
6) Ауыл шаруашылығын жүргізу үшін қажетті жағдайдың (жер телімі, қораның) болуы қажет.