Жайық өзенінде су деңгейі қауіпті шегінен асып кетті: 11 ауыл су астында қалуы мүмкін
Өзен бір тәулікте 24 сантиметрге көтеріліп, қауіпті шектен асып кетті
Батыс Қазақстан облысының 11-ден астам елді мекені Жайық өзеніндегі су деңгейінің көтерілуіне байланысты су басу қаупі бар аймақта орналасқан. Бұл туралы Azattyq Ruhy ҚР ТЖМ баспасөз қызметіне сілтеме жасап хабарлайды.
Ведомство мәліметінше, қауіпті жағдайға байланысты ТЖ министрі Шыңғыс Әрінов өңірде екі тәулік бойы әр ауылды аралап, үйінді бөгеттердің жай-күйін тексерді.
Министр Бөрлі, Январцево, Рубежинское, Озерное, Володарское, Байқоныс, Жайық және т.б. ауылдарда болды. Су тасқыны кезеңі басталғаннан бері өңірде 100 шақырымнан астам қорғаныс жер бөгеттері салынды.
Айта кетерлігі, «Қазгидромет» мәліметінше, 21 сәуір таңғы сағат 08.00-де өзен деңгейі облыс орталығындағы гидробекетте бір тәулікте 24 сантиметрге көтеріліп, қауіпті шектен (850 см) асып кетті.
