Бұл мәйіттердің қиранды астында қалмағанына көз жеткізу үшін жасалады
Мәскеу облысының губернаторы Андрей Воробьев өртенген «Крокус Сити Холл» концерт залында іздеу жұмысы тағы бір тәуліктен астам уақытқа созылатынын айтты. Бұл туралы Azattyq Ruhy агенттігі BBC-ге сілтеме жасап хабарлайды.
«Мақсат – мәйіттердің қиранды астында қалмағанына көз жеткізу және осы мақсатта үйінділер бөлшектеледі. Іздеу операциясы ертеңгі сағат 17:00-ге дейін созылады. Ауысыммен мыңға жуық адам жұмыс істейді: құтқарушылар, кинологтар, құрылысшылар», - делінген оның жеделхат арнасында.
Воробьев ауруханаларда 97 адам жатқанын айтты.
Сонымен бірге Мәскеу денсаулық сақтау департаменті ауруханаларға жатқызылғандардың тізімін жаңартты. Ведомствоның мәліметінше, қазір 76 науқас емделіп жатыр, оның ішінде төрт бала. Алты адам – өте ауыр жағдайда, 23 науқас – ауыр жағдайда.