Қазақстан СІМ басшысы ЕҚЫҰ Тұрақты кеңесінің отырысына қатысты

Аустрияға жұмыс сапары аясында Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Еуропадағы қауіпсіздік және ынтымақтастық ұйымының (ЕҚЫҰ) Тұрақты кеңесінің отырысына қатысып, Қазақстанның Ұйым алдында тұрған күрделі мәселелерді шешуге белсенді жәрдемдесуге дайын екенін білдірді, деп хабарлайды Azattyq Ruhy.

Энергетикалық қауіпсіздік, азық-түлік дағдарысы және климаттың өзгеруі сияқты жаһандық сын-қатерлерге ерекше назар аударылды. Осы тұрғыда М. Нұртілеу бұрын-соңды болмаған жаһандық дүрбелең жағдайында көпжақты институттардың рөлін атап өтті және еліміздің Ұйым функционалдығын сақтауға деген ұмтылысын растады.

«Қазақстан ЕҚЫҰ-ны географиялық жағынан алуан түрлі өкілдігі бар, ортақ мүдделерге сай келетін бірегей платформа ретінде сақтау және нығайту қажеттілігіне терең сенеді», – деді министр.

Қазақстанның бейбіт ұмтылыстары туралы айта келе, сыртқы саяси ведомствосы басшысы сындарлы, өзара сыйластық диалог пен өзара іс-қимыл арқылы дауларды дипломатиялық шешуге бейілділігін атап өтті.

Орталық Азиядағы өңірлік ынтымақтастықтың жанданғанын атап өтіп, министр өңір елдерінің әлемдік аренадағы ұжымдық өзара іс-қимылының маңыздылығына назар аударды. Осы тұрғыда Қазақстанның өңірлік тұрақтылық пен өзара байланыстылыққа бейілділігін растайтын түрлі бастамалар, оның ішінде Орталық Азия мен Ауғанстанға қызмет көрсететін Алматыда БҰҰ-ның Орнықты даму жөніндегі өңірлік орталығын құру бастамасы айтылды.

Қазақстан СІМ басшысы БҰҰ-ның 2026 жылға жоспарланған Өңірлік климаттық саммитіне назар аударды, сондай-ақ болашақта Тараптар конференциясын (COP) қабылдауға дайын екенін білдірді. Бұл бастамалар Қазақстанның 2060 жылға қарай көміртегі бейтараптығына қол жеткізудегі және жасыл мен жаңартылатын энергия көздеріне жаһандық көшуді ынталандырудағы белсенді ұстанымын көрсетеді.

М. Нұртілеу сондай-ақ жаһандық қауіпсіздіктің өсіп келе жатқан сын-қатерлері аясында бірлескен күш-жігерді талқылау мақсатында Астана халықаралық форумының әлемдік қоғамдастық үшін тиімді диалог алаңы ретіндегі рөлін атап өтті.

Қазақстанның стратегиялық географиялық орналасуын атап өтіп, ҚР СІМ басшысы еліміздің шалғайдағы нарықтарды байланыстыру және негізгі көлік дәліздері бойынша құрлықтық көпір ретінде қызмет ету қабілетіндегі бірегей артықшылықтарын, сондай-ақ ЕҚЫҰ-ның Ұйым кеңістігінде өзара байланысты ілгерілетудегі әлеуетін атап өтті. Ұжымдық іс-қимылдың арқасында Транскаспий халықаралық көлік бағыты бойынша тасымалдау көлемі соңғы екі жылда үш еседен астам өсті.

«ҚР Сыртқы істер министрі демократиялық институттарды нығайтуға, адам құқықтарын қорғауға және азаматтық қоғамды дамытуға бағытталған шаралар кешеніне назар аударып, Қазақстанның орнықты әлеуметтік-саяси дамуға қол жеткізуге стратегиялық бағдарын атап өтті. «Қазақстан өзінің демократиялық қайта құру жолын жалғастыруда. Менің бүгінгі басты жолдауым – еліміздегі демократиялық өзгерістер қайтымсыз», – деді министр.

Отырысқа қатысушылар азаматтардың өмір сүру сапасы мен әлеуметтік әл-ауқатын жақсартуға бағытталған Мемлекет басшымыздың саяси және әлеуметтік-экономикалық реформаларына қолдау білдірді.

Тұрақты кеңес отырысының аясында ҚР сыртқы саяси ведомствосының басшысы М.Нұртілеу ЕҚЫҰ Бас хатшысы Хельга Шмидпен кездесті. Тараптар Ұйым басшылығының Қазақстанға, оның ішінде Астана халықаралық форумына қатысу үшін жоспарланған сапарларына назар аудара отырып, ЕҚЫҰ шеңберінде ҚР ынтымақтастығын тереңдету перспективаларын талқылады.