Медициналық ұйымның заңсыз қызметі қоғамдық денсаулыққа қауіп төндірген
Қарағандыда еңбек мигранттарына жалған медициналық анықтамалар беру жолы кесілді, деп хабарлайды Azattyq Ruhy.
Қарағанды облыстық прокуратурасының тапсырмасы бойынша жеке медициналық ұйымның қызметі тексерілді.
«Еңбек мигранттарына жұмысқа орналасу үшін 075/Е нысанындағы 700-ден астам жалған медициналық анықтама беру фактілері анықталды. Жекелеген жағдайларда жалған анықтамалар деструктивті діни ағымдарды ұстанатын адамдарға берілген, соңғылар кейіннен анықталып, ел аумағынан шығарылды», - делінген прокуратура хабарламасында.
Айта кету керек, медициналық орталықта медициналық тексеруден өтуді растайтын құжаттама, сондай-ақ оны жүргізуге қажетті жағдайлар болмаған.
«Медициналық ұйымның заңсыз қызметі азаматтарымыздың қоғамдық денсаулығына қауіп төндірген. Қарағанды облысы бойынша Медициналық және фармацевтикалық бақылау департаменті медициналық ұйымның кінәлі тұлғаларына қатысты әкімшілік шаралар қабылдады, ұйымның қызметін тоқтата тұру туралы нұсқама енгізілді», - делінген хабарламада.
Аталған дерек бойынша сотқа дейінгі тергеп-тексеру органдары қылмыстық іс тіркеді, тергеу жүргізіліп жатыр.