Украина Президенті Владимир Зеленскийдің жұбайы BBC-ге сұхбат берді
Украина Президенті Владимир Зеленскийдің жұбайы Елена Зеленская егер Батыс елдері қаржылық қолдау көрсетуді жалғастырмаса, украиналықтарға «өлім қаупі» төніп тұрғанын ескертті, деп хабарлайды Azattyq Ruhy BBC Russian-ға сілтеме жасап.
Украинаның бірінші ханымы АҚШ-тың республикалық сенаторлары Украина мен Израильге көмек туралы заң жобасын бұғаттағаннан кейін келесі күні BBC-ге сұхбат берді.
Заң жобасы Украинаға 60 миллиард доллар көлемінде қаржылық көмек көрсетуді көздеген еді.
«Егер әлем көмек көрсетуін тоқтатса, біздің халық қиын жағдайға тап болады», — деді Зеленская берген сұхбатында. Сұхбаттың толық нұсқасы жексенбіде эфирге шығады.
«Бізге көмектесуге деген ниет жойылып кетуі мүмкін деген хабарламаларды көру өте ауыр. Біз үшін бұл өмір сүру мәселесі», - деді ол.
Ұлыбританияның Сыртқы істер министрі Дэвид Кэмерон осы аптада Вашингтонға сапары кезінде АҚШ Украинаны қолдайтын Батыс коалициясының «өзегі» екенін айтты.
Ол АҚШ қаржылық қолдауды тоқтатпауға шақырды.