АҚШ Геологиялық қызметі жер сілкінісінің магнитудасын 5,6 деп бағалады
Непал аумағында қатты жер сілкінісі тіркелді. Ең көп зардап шеккендер - ел астанасы Катмандудан батысқа қарай 500 шақырым жерде орналасқан Джаджаркот пен Рукум аудандарының тұрғындары. Құтқарушыларға көмек көрсету үшін әскери және қауіпсіздік қызметтері жұмылдырылған, деп хабарлайды Azattyq Ruhy BBC Russian-ға сілтеме жасап.
Непалдың астанасында, сондай-ақ көрші Үндістанның қалаларында, соның ішінде Делиде күшті жер сілкіністері сезілді.
Армия өкілі 100-ден астам адам жарақат алғанын хабарлады. Джаджаркот ауруханасы жаралыларға толы.
Негізгі жер сілкінісінен кейін бір сағат ішінде тағы үш мәрте жер дүмпуі қайталанды, көптеген адамдар түннің қалған бөлігін ашық ауада өткізді.
Жергілікті бұқаралық ақпарат құралдарының видеосында көп қабатты кірпіш үйлердің құлаған қабырғалары көрсетілген. Адамдар қирандылардың астынан аман қалғандарды табуға тырысып, үйінділерді қазып жатыр.
Непалдың премьер-Министрі Пушпа Камал Дахал шұғыл түрде жер сілкінісінен зардап шеккен аймаққа барды.
Алайда іздеу-құтқару жұмыстары жер сілкінісі салдарынан жолдарды көшкіннің жауып тастауына байланысты қиынға соғып жатыр.
Непалдың мониторинг және зерттеу орталығының мәліметі бойынша, жер сілкінісі жергілікті уақыт бойынша 23:47-де тіркелген.
АҚШ Геологиялық қызметі жер сілкінісінің магнитудасын 5,6 деп бағалады және оның ошағы таяз тереңдікте екенін хабарлады.
Непал Гималайда, сейсмикалық белсенділігі жоғары аймақта орналасқан.
2015 жылы елде екі жойқын жер сілкінісі болды, нәтижесінде 9 мың адам қаза тауып, 22 мыңнан астам адам жарақат алды, 800 мыңнан астам үй қирап зақымданды.