Батыс Қазақстанда 320 орындық спорт кешені ашылды

БҚО-да Ақжайық ауданы орталығы Чапаев ауылында 320 орындық спорт кешені пайдалануға берілді, деп хабарлайды Azattyq Ruhy.

«Қазақстан Республикасының Президенті Қасым-Жомарт Кемелұлы Тоқаев «Денсаулық кілті» дене шынықтыру. «Бұқаралық спортқа жағдай жасау қажет» деген болатын. Өңірде  бұқаралық спортты дамытуға зор көңіл бөлініп келеді. Спорт саласы қоғамның әлеуметтік ұйысуына, болашағы бір ұлтты қалыптастыруға ықпал ететін перспективалы алаңдардың бірі. Экономикалық тұрғыдан дамыған елдер бұл көрсеткішті 30 пайызға жеткізуге ұмтылуда.

Дене шынықтыру-сауықтыру кешенінің бірінші қабатында спорттық ойын түрлеріне арналған зал, баскетбол, волейбол, шағын футбол ойындарына шағын алаң бар, мүмкіндігі шектеулі жандарға арналған орындар, бір уақытта 7 адамға дейін шыныға алатын жаттығу залымен жабдықталған. Екінші қабатта шешінетін және жуынатын орынмен жабдықталған күрес залы мендойбы,шахмат,тоғызқұмалақ ойнайтын бөлме қарастырылған.

2020 жылы құрылысы басталған ғимарат ауданы 2369,4 шаршы метрді құрайды. Спортшыға қажеттінің барлығымен жабдықталған нысан «Қарашығанақ Петролиум Оперейтинг Б.В» компаниясы бөлген қаражатқа салынды. Түрлі себептермен құрылысы ұзаққа созылған кешенді «NurKurylys Construction» ЖШС тұрғызды.

Нысанның ашылу салтанатында сөз алған облыс әкімі Нариман Төреғалиев Президенттің тапсырмаларына сәйкес облыста халықтың әл-ауқатын арттыруға, бұқаралық спортты дамытуға жасалған жағдайға қысқаша тоқталып өтті.

«Қуанышты мереке күні бүгін Ақжайық ауданының Чапаев ауылында жаңадан салынған заманауи 320 көрермендік орынға арналған дене шынықтыру-сауықтыру кешенінің ғимараты халық игілігіне пайдалануға берілгелі тұр. Бұл спорттық нысанда халықтың спортпен шұғылдануы үшін бар жағдай жасалып, ғимарат ауданның барлық санаттағы тұрғындары үшін қолжетімді болады. Аталған спорттық нысанда тайпақтықтардың спортпен шұғылдануы үшін бар жағдай жасалып, ғимарат ауданның барлық санаттағы тұрғындары үшін қолжетімді болады.  Бұл мемлекетіміздің ауылдық елдімекендердің тұрғындарына қамқорлығы мен жанашырлығы деп білуіміз тиіс.  Спорт кешенінің іске қосылуы ауыл спортын қарқынды дамытуға, ауыл тұрғындарының спорттық белсенділігін арттыруға, чемпиондарды тәрбиелеуге зор септігін тигізетініне сенімдіміз. Ұлт саулығы еліміздің басты құндылығы деп бағалайтын ҚР Президенті Қ.К.Тоқаев жыл сайынғы Жолдауында бұқаралық спортты дамыту мәселесіне ерекше назар аударып, осы мақсатта «100 дене шынықтыру-сауықтыру кешені» жобасын іске асыруды міндеттегені белгілі.  Мемлекет басшысының тапсырмасын орындау аясында 2019 жылы облыс бойынша 9 дене шынықтыру-сауықтыру кешені қолданысқа берілсе, бүгін, міне, су жаңа ғимарат Чапаев және Тайпақ ауылдарында да халыққа есігін ашты. Енді спорт кешенінде волейбол, баскетбол, футзал, қазақ күресі, еркін күрес, дзюдо, қол күресі сынды спорт түрлерімен шұғылдану үшін барлық жағдайлар жасалған», – деген өңір басшысы Нариман Төреғалиев Ақжайық ауданында туып-өскен есімдері әлемге әйгілі спортшылардың есімін тізбектеді.

Олардың қатарында самбо күресінің шебері, ҚР еңбек сіңірген спорт шебері, Әлемнің 4 дүркін чемпионы Ерболат Байбатыров, грэпплингтен ҚР халықаралық дәрежедегі спорт шебері, Әлем чемпионы Зайреден Мұхамбетжанов, қол күресінен ҚР спорт шебері, жастар арасында Әлем чемпионы Кенжеқыз Қаупенова, бокстан ҚР спорт шебері, Азия чемпионатының күміс жүлдегері Даниал Сәбит, қол күресінен Азия кубогінің жеңімпазы Ізбасар Нұрбол бар. Одан бөлек әлем чемпионатының күміс жүлдегері Болатбек Райымқұлов, самбодан ҚР халықаралық дәрежедегі спорт шебері, самбодан Әлем чемпионатының жүлдегері Бағдат Жарылғасов, самбодан және грэпплингтен ҚР дәрежедегі спорт шебері, самбодан жастар арасында Әлем чемпионатының күміс жүлдегері Армат Қабдолов сынды спортшылардың есімін мақтанышпен атап өтті.

Спорт кешенінде спортшылар ғана емес, түрлі жастағы ауыл тұрғындары да спортпен айналысып, денсаулықтарын нығайтады және бос уақыттарын тиімді өткізе алады. Салтанатты шарада ауданның  мәдениет, білім  және спорт саласының дамуына үлес қосқан еңбек ардагері Бақтығали Қоспаев  спорт кешені Жұбан елі жастарының биік белесті бағындыруына сеп болатынын айтып, елімізде салауаттылық салтанат құрып, ұлтымыз ұлықты, халқымыз ғұмырлы болуын тіледі, ал ақын Сағынтай Бисенғалиев жүрекжарды жырын арнап, спортшылардың рухын көтерді.

Ауыл спортын жаңа биікке шығарып, алыстағы елді мекен тұрғындарын спортпен шұғылдануға мүмкіндік берген дене шынықтыру сауықтыру кешенінің лентасын өңір басшысы Нариман Төреғалиев пен бокстан ҚР чемпионы, Азия ойындарының күміс жүлдегері Даниял Сәбит кесті.

Ғимарат ішін аралып, спортшылармен тілдескен өңір басшысы ауыл баладарына арнайы дайындалған сыйлықтарын табыстады.