Ол Жаңаөзендегі еңбек даулары туралы айтты
Жаңаөзен қалалық мәслихатының депутаты Асқар Ноғаев «AMANAT» партиясынан сайланған барлық деңгейдегі мәслихаттар депутаттарының республикалық форумында сөз сөйледі, деп хабарлайды Azattyq Ruhy.
«Бізге мұнай-газ кешені саласының жұмысшылары мен кәсіподақ ұйымдары да жиі өтініш-ұсыныстарымен шығады. Әсіресе, еңбек даулары жиі өтеді. Міне, осындай даулардың бел ортасында «AMANAT» партиясының депутаты ретінде халықпен кездесіп, олардың мұң-мұқтаждарын тыңдап, билікке ұсыныстарын жеткізіп, өз деңгейімізде шешуге үлес қосып келеміз», - деді депутат.
Ол депутаттар да халықтың бел ортасынан шыққанын айтты.
«Жерлестеріміздің көзіне тік қарай аламыз. Ар-ожданымыз таза. Ал халыққа адал қызмет ету, олардың мұң-мұқтажын заң аясында қарап, шешу, сенімін ақтау – осында отырған баршамыздың міндетіміз. Сондықтан әрқайсымыз ел мүддесі үшін, кемелді келешек үшін жұдырықтай жұмылып, жұмыс істеуіміз керек», - деді ол.
Айта кетейік, еліміздің барлық өңірінен Мәжіліс пен мәслихаттардағы фракция мүшелері саяси іс-шараға жиналды. Бүгінгі форумға жалпы 2500-ден астам партиялас қатысты. Форум барысында Мемлекет басшысы Қасым-Жомарт Тоқаевтың реформаларын жүзеге асыру аясында өңірлерді дамыту, сондай-ақ мәслихаттардың өкілеттіктерін кеңейту мәселелері талқылады.