Солтүстікте тұрғындар бірнеше айдан бері ауылдан шыға алмай отыр

Солтүстік Қазақстан облысының Жамбыл ауданындағы «Петровка – Святодуховка – Бауман» бағытындағы жолдың 19 шақырымын жөндеу жұмыстары орта жолдан тоқтап, тұрғындар бұрынғы күндеріне зар болып қалды. Мердігер компания осыдан екі ай бұрын жол бойының қақ ортасына қиыршық тас үйіп, сол қалпында тастап кеткен.  Кесірінен маңайдағы елді мекендердің барлығында көлік қатынасы тоқтаған, деп хабарлайды Azattyq Rýhy тілшісі.

«Петровка – Святодуховка – Бауман» бағытындағы тас жол Святодухова мен Бауманнан бөлек Сәбит, Жаңажол, Ольговка, Қарақамыс сынды тағы бірнеше ауылды аудан, облыс  орталықтарымен жалғайды. Жаз бойы аталған елді мекендердің тұрғындары егін алқабының дәл ортасынан салып алған төте жолмен қатынап келген. Ауа райы бұзылып, күздің жаңбырлы күндері басталғалы халық ауылдан мүлде шыға алмай қалған.

«Жаңбыр жауса, ауылдан шығу мұңға айналады. Жолдың қақ ортасында тас төгіліп жатыр. Шетімен жүру мүмкін емес. «Джип» болмаса, қарапайым көлік қозғала алмайды. Аудан орталығына бару қажет. Петровкаға жеткенше көлікті итеріп барамыз. «Жол жөнделеді» деген жаңалықты естіп, бөркімізді аспанға атқан едік. Қуанышымыз ұзаққа созылмады. Қазіргі жағдайы мынау. Солтүстік өңірде қазан айынан жауынды күндер басталады. Көп ұзамай ауа райы салқындап, қар түседі. Қиыршық тас үйінділері осылай қатып, ақ ұлпаның астында қалса күніміз не болмақ?», - дейді Святодуховка ауылының тұрғыны.

«Петровка – Святодуховка – Бауман» бағытындағы жол тәуелсіздік жылдары бірде-бір рет күрделі жөндеу көрген емес. Әбден тозығы жеткенін әр метр сайын кездесетін ой-шұңқырға қарап аңғарасың. Ауыл тұрғындарының назын жеткізбек болып, Жамбыл ауданы әкімінің ауыл шаруашылығы, құрылыс және шұғыл мәселелер жөніндегі орынбасары Жомарт Мәмбеталиновке бірнеше мәрте хабарластық. Шенеунікпен кездеспек түгілі, телефон арқылы сөйлесу мүмкін болмады. Сөздің соңын тыңдамастан облыс әкімінің қатысуымен өтетін кеңеске шұғыл дайындалып жатқанын, жолдың жағдайын сөз етуге уақыты жоқтығын айтып, телефон тұтқасын қоя салды.

Биыл Жамбыл ауданының қазынасынан «Петровка – Святодуховка – Бауман» бағытындағы жолды тегістеуге  166,7  миллион теңге бөлініпті. Тендерді «Элен - 1» серіктестігі ұтып алған. Мекеме басшысы Роберт Хнкоян жұмыстың осынша уақытқа созылып кетуіне ауа райы кедергі екенін айтып ақталмақ болды.

«Жолдың сапасы өте төмен. Ұзақ уақыт жөндеу көрмегендіктен, ой-шұңқыры көп. Оның бәрін тегістеу – біраз уақыт алады. Қиыршық тасты Шал ақын ауданынан Троебратное станциясы арқылы тасымалдадық. Оның өзі қаншама қаржы мен уақытты талап етеді. Елді мекендердің тұрғындары төте жолмен жүріп жатыр. Жобалық-сметалық құжатқа енбей қалған жерлер бар. Оны өз есебімізден тегістейміз. Қыркүйек айында жаңбыр көп болды. Ол кепкенше қаншама уақыт өтіп кетті. Осының барлығы қолбайлау. Өзім жолды тезірек тапсыруға ниеттімін. Кешіктірілген әрбір күн үшін 30 мың теңге көлемінде айыппұл төлеймін. Айналасы 160 миллион теңгеден ештеңе қалмайтын болды», - дейді Роберт Хнкоян.

Мердігер біз хабарласқаннан кейін жол тегістеле бастағанын, қиыршық тасты жаю жұмыстарын 10 күнде аяқтауға уәде етті.

Биыл Жамбыл ауданында облыстық маңызы бар «Благовещенка – Қайранөл» бағытындағы тас жол да орташа жөндеуден өтуі тиіс. Облыстық жемқорлыққа қарсы іс-қимыл департаменті мен «Нұр Отан» пратиясы өкілдері бірлесіп жүргізген мониторинг  мердігер компанияның өз ісіне жауапсыз қарағанын анықтады. Жөндеу жұмыстары аяқталмай жатып, тас жол жарылып жатыр.

«Жол азабын жүрген біледі» демекші, жөндеу жұмыстарына қуандық. Қысқа ғана уақыт аралығында асфальт бетінде ойықтар пайда болды. Әлден осындай күйге түсіп жатса, ертең не болады? Қыста қар жауып, көктемде ерігенде жолдың бәрін су шайып кетеді ғой мына түрімен», - дейді такси жүргізушісі Серік Нұғыманов.

«Арнайы талап бойынша асфальт қабатының қалыңдығы 5 саниметрден кем болмауы тиіс. Аздаған ауытқушылықтар болады әрине. Бірақ «Благовещенка – Қайранкөл» жолында төсеменің қалыңдығы кей жерлерде 2,5 см ғана. Оған қоса астына қиыршық тастың орнына құм мен сары балшық қана төселген. Соның салдарынан асфальт тез ойылып, жарамсыз боп қалған. Ал тығыздығын зертханада тексереміз», - дейді Жол активтерін бақылау ұлттық орталығының инженері Еркін Әбілмәжінов.

17 шақырым жолға қазынадан 600 миллион теңге бөлінген. Арнайы тексеріс барысында белгілі болғандай, мердігер компания бөлінген қаржыны белгіленген мақсатқа ұқсатпаған.

«Асфальт салмас бұрын астына құм мен тас төсеу барысында жүк көліктері жүріп, ойып тастаған. Соның кесірінен кейбір жерлері үгітіліп қалды. Енді, бұл олқылықтарды жоямыз. Асфальтты қайтадан төсейміз», - дейді мердігер компания өкілі Гарик Мелконян.

Жергілікті тұрғындардың шағымы бойынша мамандар жолдың сынамасын алды. Арнайы комиссия өкілдері жөндеу жұмыстарындағы олқылықтар жойылмаса, нысан қабылданбайтынын жеткізді.

Эльмира Мәмбетқызы, СҚО