Ірі сауда желілеріне тауар өндірушілермен тікелей жұмыс істеу ұсынылды
Қаржы мониторингі агенттігінің Қарағанды облысы бойынша департаментінің қызметкерлері облыстың сауда желілерін жеміс-жидек пен көкөніспен қамтамасыз етуде қажетсіз делдалдарды анықтады, деп хабарлайды Azattyq Ruhy.
Ведомство мәліметінше, тәртіп сақшылары ірі сауда желілерінің өкілдеріне тауар өндірушілермен тікелей жұмыс істеуді ұсынады.
«Департамент бастамасымен облыс әкімдігінің алаңында «Нейдоровское» шаруа қожалығының картобын «Корзина» және «Южный» супермаркеттер желілеріне делдалсыз тікелей жеткізу туралы келісім жасалды. Осыған байланысты картоптың бағасын 160-180 теңгеден 115 теңгеге дейін төмендетуге мүмкіндік туды.Сонымен қатар «Норма» супермаркетінде әлеуметтік картопты тікелей «Шанс» шаруа қожалығынан келісін 70 теңгеден жеткізеді. Осы келісімнің нәтижесінде картоп бағасы 30 пайыздан астам сомаға қысқарды», - делінген хабарламада.
ҚМА кәсіпкерлерге «Сауда қызметін реттеу туралы» заңның 9-бабына сәйкес әлеуметтік маңызы бар азық-түлік тауарларына шекті сауда үстемесінің мөлшері өндірушінің өткізу бағасының немесе көтерме жеткізушінің сатып алу бағасының 15 пайызынан аспауы керек екенін еске салды.