Сол сияқты баспаналы болу жайы да қозғалды
«AMANAT» партиясы трансформациядан өтіп, 70 пайызға жаңарды. Жаңа құрамда әйелдер мен жастар саны да аз емес. Отыз жылдық тарихы бар іргелі саяси құрылым ел көлемінде өтіп жатқан сайлауалды шаралар легін Атырау өңірінде де өз деңгейінде жалғастыруда, деп хабарлайды Azattyq Ruhy.
Партия атынан алдағы сайлауға қатысатын кандидаттардың үгіт-насихат өткізудегі негізгі мақсаты – халықтың талап-тілегіне негізделген сайлауалды бағдарламаны таныстыру. Дәл осы миссияны көздеген облыстық сайлауалды штабтың бір топ мүшесі бүгін қаладағы №2 емхана ұжымымен кездесті.
Басқосу барысында сайлау додасына қатысты жаңашылдықтар кеңінен түсіндірілді. Оған қоса, «AMANAT» партиясының «Халықпен бірге!» сайлауалды бағдарламасы, оның 10 тарауы талданып, нақты нәтижелері туралы айтылды.
Тұрғын үйге қолжеткізу, баспаналы болу – маңызды мәселе. Сала мамандарын толық қамту мүмкін еместігін айтқан ұжым мүшелері таяуда облыс көлемінде жүзеге асырылған «Атырау жастары» бағдарламасы туралы мәселе көтерді.
«Біздің емхана сенімгерлік басқаруға берілген. Жаңа бағдарламаға құжаттарын тапсырған әріптестеріміздің көпшілігіне «Мемлекеттік мекемеге жатпайсыздар» деген себеппен, құжаттарын қабылдамады» дейді олар.
Рас, аймақтағы түрлі салада еңбек ететін жастарды баспанамен қамту мақсатын көздеген аймақтық бағдарламаға ақпан айында құжаттар қабылданды. Қазір олар қарастырылу үстінде. Нақты нәтиже содан кейін белгілі болмақ.
Бұған қоса, денсаулық сақтау саласына қатысты өзге де түйткілді мәселелер кеңінен айтылды. Олардың арасында алдағы бес жылдықта облыс аумағында 20 денсаулық сақтау нысанын салу мәселесі де талқыланды.
«AMANAT» партиясы Атырау облысының сайлау қоры қаражатынан төленді