Ол соңғы рет Мәдениет және спорт министрі лауазымын атқарды
Дәурен Абаев ТМД Бас хатшысының орынбасары лауазымына тағайындалды. Ақпаратты ТМД Атқару комитетінің баспасөз қызметі растады, деп хабарлайды Azattyq Ruhy Tengrinews.kz-ке сілтеме жасап.
«Біз Қазақстан Республикасының СІМ-нен Жұмаханов Бекетжан Махатжанұлының орнына Дәурен Әскербекұлы Абаев келетіні туралы тиісті нота алдық. Ол ТМД Бас хатшысының орынбасары қызметін атқарады. Ол 7 наурызда келеді. Оның тәжірибесі ТМД-ның Атқару комитетінде сұранысқа ие болады деген сенеміз», - деп жауап берді ТМД Атқару Комитеті.
Дәурен Әскербекұлы Абаев 1979 жылы 18 сәуірде Алматы облысында туған.
Еңбек жолында ҚР Сыртқы істер министрлігінде референт, атташе, үшінші хатшы (2001-2003); Қазақстан Республикасының Әзербайжандағы Елшілігінде үшінші хатшы (2003); Нидерланды Корольдігіндегі ҚР істері бойынша уақытша сенімді өкілі, екінші хатшы (2003-2007); ҚР Сыртқы істер министрлігінің баспасөз қызметінде бөлім бастығы (2007); ҚР Президенті Протоколының бас сарапшысы, консультанты (2007-2008); ҚР Президентінің баспасөз хатшысының орынбасары (2008-2009); ҚР Президенті Әкімшілігінің мемлекеттік бақылау және аумақтық-ұйымдастыру жұмыстары бөлімінің мемлекеттік инспекторы (2009); Қазақстан Республикасы Президентінің баспасөз хатшысы, кеңесшісі (2011-2016); Қазақстан Республикасы Ақпарат және коммуникациялар министрі (2016-2019). 2019-2020 жылдары – Қазақстан Республикасы Ақпарат және қоғамдық даму министрі (25.02.2019-04.05.2020); Қазақстан Республикасы Президенті Әкімшілігі Басшысының бірінші орынбасары (04.05.2020-11.01.2021); Қазақстан Республикасының Мәдениет және спорт министрі (11.01.2022-04.01.2023).