Астанада 19 наурызда қоғамдық көлікте қатынау тегін болады – әкімдік

Қазақстанда 19 наурыз күні ҚР Парламенті Мәжілісі мен мәслихаттар депутаттарының сайлауы өтеді. Сайлау күні елордада қоғамдық көліктер қалалық және қала маңындағы маршруттарда тегін болады. Бұл туралы Azattyq Ruhy Астана әкімдігінің ресми сайтына сілтеме жасап хабарлайды.

Қоғамдық көлік әдеттегі жұмыс кестесіне сәйкес сағат 6:00-ден 23:00-ге дейін қатынайды. Ал 20 наурыздан бастап, дүйсенбіде қоғамдық көлік қолма-қол ақшасыз төлеммен штаттық режимде жұмыс істейді.

«2020 жылдың наурыз айынан бастап елорда әкімінің тапсырмасы бойынша қаланың барлық кәмелетке толмаған тұрғындары үшін тегін жол жүру тәсілі енгізілген болатын. Осы уақыт ішінде оқушылар 48 миллион сапар жасады.

Сол сияқты азаматтардың жеңілдетілген санаттары, оның ішінде зейнеткерлер, мүгедектігі бар адамдар, көпбалалы отбасылар және т.б. тегін жол жүруді пайдаланады», - делінген әкімдік хабарламасында.

Естеріңізге сала кетейік, қала тұрғын елордадағы сайлау учаскесін бірнеше тәсілмен онлайн біле алады:

• Веб-қызмет: https://sailau.astana.kz/
• Telegram-дағы Чат-бот: https://t.me/sailau_astana_bot
• Smart Astana мобильді қосымшасы;
• IKomek бірыңғай байланыс орталығы 109 телефоны бойынша.