«Үш мыңнан астам іс-шара өтті»: «AMANAT» партиясының сайлауалды штабы қалай жұмыс істеп жатыр

«AMANAT» Республикалық сайлауалды штабында партияның Атқарушы хатшысы Елнұр Бейсенбаевтың қатысуымен баспасөз туры өтті, деп хабарлайды Azattyq Ruhy.

«Штабтың негізгі қызметі – жұмысымыздың дұрыс жүруін қамтамасыз ету. Бұл штабтың жаңалығы ретінде күнделікті түрде жаңа форматтағы 4-5 кездесу, оқыту сабақтары өтіп тұратынын айтуға болады. Штаб 24/7 режимінде жұмыс істейді. Өңірдегі әрбір штаб осы форматта жұмыс істейді. Әрбір блок бірлесіп, мәселені бірге шеше алады. Штабтағы әрбір құрылымдық бөлімнің жетекшісі мобильді түрде бірлесіп жұмыс атқарады», - дейді Атқарушы хатшы.

Елнұр Бейсенбаев атап өткендей, қазіргі таңда еліміз бойынша аудан, облыс және республикалық деңгейде республикалық штабтар жұмыс істеп жатыр.

«Жалпы республикалық сайлауалды штабында 7,2 мыңнан астам мүше бар. Олар – белсенді, белді, танымал азаматтар. Оған қоса барлық облыстық деңгейде 3 мыңнан астам іс-шара өтті. 300 мыңға жуық нақты азаматты қамтыдық. Сонымен қатар 1 млн-ға жуық үгіт-насихат материалдарын әрбір азаматқа тараттық. 200 мыңға жуық агитациялық материалдар  жабыстыруға рұқсат берген стенд пен дүңгіршектерге орналастырылды», - деді ол.

Қазіргі таңда «AMANAT» партиясынан Мәжіліске ұсынылған 90 кандидат  бар.

«Бір кандидат өз өңірінде, мәселесін білетін өңірлерде күнделікті кем дегенде 6-7 іс-шара ұйымдастырып жатыр. Оған қоса 29 бір мандатты кандидат бар. Олар өздерінің жеке кестелері бойынша халықпен кездесіп жатыр. Бүгінгі таңда Мәжіліс пен мәслихатқа ұсынылған 4 мыңға жуық кандидат өңір-өңірде кездесулер өткізуде. Жалпы сайлау қорытындысы бойынша 1 млн-нан астам азаматты қамтыған 30 мыңнан астам кездесу өткізуді жоспарлап отырмыз. Бұл – тікелей кездесулер. Одан бөлек, әлеуметтік желідегі жұмыстар бар. Біз мейлінше, әлеуметтік желі арқылы азаматтарды қамтуға тырысып жатырмыз. Сенбі, жексенбі күндері мобильді топтар базар, сауда орталықтарының жанында азаматтардың ұсыныс, тілектерін қабылдайды. Сондай-ақ «Есіктен есікке» іс-шарасы аясында әрбір үйге кіріп, түсіндіру жұмысы жүргізіліп жатыр», - деді ол.

Бұқаралық ақпарат құралдарының өкілдері үгіт-насихат және талдау орталығының, қоғамдық қабылдау бөлмесінің, медиа-штабтың, коворкинг алаңның, сондай-ақ жастар секторы штабының жұмысымен танысты.

Мәселен, үгіт-насихат және талдау орталығында партияның жақтастары бірқатар іс-шара ұйымдастырады. Осы орталықта партияның өңірлердегі сайлауалды активі басқарылады.

Ал баспасөз орталығында республикалық және өңірлік деңгейдегі барлық ақпараттық жұмыс бақыланып, өңделіп кері байланыс орнатылған. Сайлаудағы маңызды жұмыс – ақпараттық жұмыс. Жасалған бастамаларды көрсету, қоғамға жеткізу – аса маңызды. Сондықтан 17 облыстық және 3 қалалық медиа-жоспар мен бір республикалық медиа жоспар әзірленген. Онда әр күннің кестесі бекітілген. Осындай ақпараттық жұмыс осы медиа-штабтың орталығында жүзеге асырылады.

Жастар секторы штабында белсенді жақтастардың қатысуымен кездесулер өтеді. Олар сайлауалды бағдарламасын жастардың тілімен халыққа жеткізу үшін әлеуметтік желіде креативті идеяларды топтастыру арқылы жүзеге асырып жатыр. Штаб өкілдері өзге жастардың ұсыныс, пікірлері ескеріліп, күнделікті түрде блогтар түсірілетінін айтты.

«Жастар рухының» қатарында 100 мыңнан астам азамат бар. Бұл жастар саясатындағы ең ірі жастарға арналған ұйым. Қазақстан тарихында бұдан басқа ірі ұйым жоқ. Олардың істері де нақты», - деді ол.

Сондай-ақ баспасөз туры барысында партияның негізгі сайты таныстырылды.

«Қазір сайт сайлауалды штабқа қатысты жасақталды. Халықпен бірге жазылған бағдарлама 10 бағыттан тұрады. Бұл бағдарламаны әзірлеуде президенттік сайлаудың қорытындысы бойынша түскен 56 мыңнан астам ұсыныс та ескерілді. Оған қоса, референдумда жиналған ұсыныс бар. Бір жылдың ішінде қоғамдық қабылдау 134 мыңнан астам азаматты қабылдады. Осы ұсыныс-тілектердің барлығын қамтуға тырыстық. Бағдарламаның тағы бір ерекшелігі оның қорытындысы бойынша арнайы жол картасы әзірленді. Қазірдің өзінде онда 300-ден астам пункт бар. 20 өңірде жол картасы даярланды», - деді Елнұр Бейсенбаев.