Алматы облысының бірнеше елді мекенінде газ қысымы кенеттен төмендеп кеткен
Өңір тұрғындары қыстың суығында жылусыз қалмайды. Алматы қаласына жақын маңдағы елдімекендерді түгелдей көгілдір отынмен қамтып отырған жауапты тұлғалар осылай деп мәлімдеді. Өңірдегі аудандарда бір миллиондай адам тұрады. Әкімдер де, табиғи газға жауапты компаниялар да халықтың алаңдауына негіз жоқ деп отыр. Екібастұз бен Жезқазғандағы жылу электр орталықтарында болған апат өзгелерге сабақ. Алматы облысының бірнеше елді мекенінде газ қысымы кенеттен төмендеп, тіптен кейбір ауылдар мүлдем жылусыз қалған. Жамбыл ауданындағы Мыңбаев, Қасымбек ауылының тұрғындары газдың нашарлығына шағымданған еді. Табиғи газ жанып тұрғанымен, ас-ауқат дайындау мүмкін болмапты. Azattyq Ruhy тілшісі екі кештің ортасында әкімдікке шағымданған жұрттың ахуалын біліп, проблеманың анық-қанығын анықтады.
Газдың қысымы күрт төмендеп кеткенін бірден байқаған Жамбыл ауданының 200-ге жуық тұрғыны дереу әкімдікке шағымданған. Газдың қалыпты қысымы бір күннен кейін беріліпті.
«Қар жауғаннан кейін осындай жағдай болды. Әрине суық болды. Үйінде тоқ пеші барлар соны қосты. Біз сияқтылар қабат-қабат киініп алдық. Газ өте әлсіз жанды. Не тамақ істей алмайсың, шай қайнамайды. Ал едендегі жылу мүлдем өшіп қалды. Бір күнде қалпына келді. Енді мұндай қайталанбасын деп отырмыз», - деді Мыңбаев ауылының тұрғыны Серікбай Нұртаев.
«Газ сығырайып тұрды, үйде температура төмен болды. Тоңдық. Ауыл тұрғындары әкімдікке барды. Газ құбырының басшысы келді. Бізде құбырлар бітіп қалған деп түсіндірді. Бүгін жылу берілді, қосты», - деді ауыл тұрғын Бейбіт Сұлтанбай.
Көгілдір отын бір мезетте өшкен Жамбыл ауданына қарасты ауылдарға «Тәуекел-газ құбыры» жауапкершілігі шектеулі серіктестігі қызмет көрсетеді. Белгілі болғандай қызметкерлер түнімен жөндеу жұмыстарын жүргізіпті.
«Иә бір күн газдың қысымы төмендеп кеткені рас. Газ құбырының ішінде конденсат жиналған. Сондықтан газдың өтуі қиындаған, сол себепті қысым да бәсеңдеп кеткен. Мұндай жағдайды қыстыгүні ғана анықтай аламыз. Шұғыл құбырларды ашып, жұмысшылар түнімен осы ауылдарда жөндеу жүргізді. Енді мұндай жағдай қайталанбайды деп уәде береміз. Екібастұздағы жағдай бізге сабақ болды. Ондай болмайды. Керісінше біз халықтың әлеуметтік жағдайын ескереміз. Мүгедек балалары бар, көпбалалы аналарға, жағдайы төмен жанұяларға табиғи газды тегін қосып жатырмыз. Кез келген тұрғынның шағымын ескеріп, бірден шара қабылдаймыз. Халықтың алаңдауына негіз жоқ, қыста тоңбайды», - деді «Тәуекел-газ құбыры» ЖШС директоры Қазыбек Ғабиден.
Ал күні кеше Алматы телеарнасы газбен қамтамасыз ететін дәл осы компанияға қарасты Алматы облысы, Талғар ауданындағы мәселені жариялап еді. Онда газ құбырында апат болып 60 мыңға жуық тұрғын жылусыз қалған. Апатқа шіріген ағаштардың газ құбырына құлағаны себеп болған. Ал тұрғындар ағаштардың құлау алдында тұрғанын әкімдікке ескерткендерін алға тартқан.
Жергілікті әкімдіктің айтуынша, бұған дейін Құлжа тасжолы бойының аумағы «ҚазАвтоЖол» Ұлттық компаниясына тиесілі болыпты. Сол себепті, мұндағы мәселелер назардын тыс қалған көрінеді. Аумақ әкімдік қарамағына биыл ғана өткендіктен ағаштарға санитарлық кесу жұмыстарына қаржы тек алдағы жылы қарастырылыпты. Ал құлаған ағаштың салдарынан газдан ажыратылған тұрғындарға «Тәуекел-Н-Алғабас» мекемесі бір күннен кейін көгілдір отынды қостық, ақау жоқ деп мәлімдеді.
Айта кетейік, аталған компанияға 80 мың абонент газға қосылған. «Тәуекел-газ құбыры» мекемесі Үкіметтен ешқандай қаржылық қолдау көрмейтінін алға тартты. Айтуларынша бір ғана Алматы облысы Жамбыл ауданындағы 61 елдімекеннің 29-ын көгілдір отынға қосып үлгерген. Қалған ауыл-аймақтың газға қосыла алмай отырғаны жергілікті билікке қатысты дейді. Өйткені әкімдік әлі қай компанияға өткізетіндерін анықтамаған.
Газдың 1 куб метр бағасы – 29,12 теңге. Былтырғымен салыстырғанда 1,19 теңгеге қымбаттаған. Компания табиғи монополияларды реттеу комитетінің бекітіп берген тарифінен бағаны асырмаймыз деп отыр. Жауапты тұлғалардың сөзіне сенсек, өңір тұрғындары қыста табиғи газдан қысылмайды.