Ол саяжайда орналасқан жерасты зертханасында құрамында есірткі заттары бар өсімдіктерді заңсыз өсірумен айналысқан
Ақтөбеде ірі көлемде есірткі сақтаған азамат 6 жылға сотталды, деп хабарлайды Azattyq Ruhy Ақтөбе қаласы ПД баспасөз қызметіне сілтеме жасап.
«Ақтөбе облысының қылмыстық істер жөніндегі мамандандырылған ауданаралық соты 48 жастағы азаматқа қатысты қылмыстық істі қарады. Күдікті құрамында есірткі заттары бар, өсіруге тыйым салынған қарасора өсімдіктерін ірі мөлшерде өсірген және оның әрекеттері ҚР ҚК-нің 300-бабы 2-бөлігінің 3-тармағы бойынша дұрыс сараланған және есірткі құралдарын ірі мөлшерде өткізу мақсатында кептірілген марихуананы заңсыз сақтаған және оның әрекеттері ҚР ҚК-нің 297-бабының 2-бөлігі бойынша дұрыс сараланған», - делінген хабарламада.
Естеріңізге сала кетейік, 2022 жылдың мамыр айының соңында Ақтөбе облысы ПД Есірткі қылмысына қарсы іс-қимыл басқармасының қызметкерлері саяжайда орналасқан жерасты зертханасын пайдалана отырып, Ақтөбе қаласының аумағында есірткі заттарын өткізу мақсатында құрамында есірткі заттары бар, өсіруге тыйым салынған өсімдіктерді заңсыз өсірумен айналысқан ер адамды ұстады. Есірткі зертханасы техниканың соңғы үлгілерімен жабдықталған. Ұсталған адамның айтуынша, тұқымдар мен жабдықтарды интернет-дүкеннен сатып алған.
Тәркіленген есірткі заттарының жалпы салмағы 400 грамнан астам болды, сонымен қатар ұсталған адам каннабиоидтарды қолданудан туындаған есірткілік мас күйде болған. Сот оған 6 жыл мерзімге бас бостандығынан айыру жазасын тағайындады.