Ол кеншілермен кездесті
ЖСДП-дан ҚР Президенттігіне кандидат Нұрлан Әуесбаев Қарағанды облысының Шахтинск қаласындағы «Шахтер даңқы» ескерткішіне гүл шоқтарын қойды, деп хабарлайды Azattyq Ruhy аталмыш партияның баспасөз қызметіне сілтеме жасап.
Нұрлан Әуесбаев атап өткендей, шахтер мамандығы бүгінгі таңда ең қауіпті мамандықтардың бірі болып саналады, себебі жыл сайын ондаған кенші қаза табады. Соңғы 20 жылда кейбір мәліметтер бойынша, жазатайым оқиғалардан 120-дан астам адам көз жұмған.
Үміткердің айтуынша мұндай қайғылы статистиканың себебі олигархтар еңбек қауіпсіздігі шараларын жақсартуға қаражат бөлгісі келмейді.
«Мен табиғи қазбаларды өндіретін компанияларды мемлекет меншігіне алуды ұсынамын. Бұл кеншілердің тиісті еңбек жағдайларын қамтамасыз етуге жауапкершілікпен қарауға мүмкіндік береді. Сонымен қатар, ЖСДП кеншілердің жалақысын көтеруді, зейнеткерлік жасын төмендетуді жақтайды», – деп атап өтті Нұрлан Әуесбаев.