Бұған дейін қырғызстандық жүргізушілер шекарадағы жүк көліктерінің кептелісіне шағымданған болатын
Мемлекеттік кірістер комитеті «Қарасу» өткізу бекетінде қазір жүк кептеліс жоқ екенін мәлімдеді, деп хабарлайды Azattyq Ruhy.
«Жүк көліктерінің уақытша шоғырлануы Ресейден Қырғызстанға транзитпен келе жатқан көптеген көліктердің бір уақытта келуімен байланысты болды», - деп түсіндірді Мемлекеттік кірістер комитеті.
22 қыркүйектен бастап Қазақстан-Ресей шекарасында бірінші кезекте өткізілген Ресей азаматтарының ағымы өсті. Ресейден Қазақстан аумағына жүк көлігінің кіруі Ресей шекара қызметімен уақытша шектелді.
«Ресей азаматтарының ағыны азайғаннан кейін жүк көліктері Ресей тарапынан Қазақстан мен Қырғызстан бағытында бір уақытта жіберілді. Осы себепті «Қарасу» бекетіне жүк машиналарының бір мезгілде келуі байқалды. Қазір Қазақстанның шекара қызметі мен Мемлекеттік кірістер комитетінің экспорттық бақылауы штаттық режимде жұмыс істеуде», - делінген хабарламада.