Биыл акция аясында 30 мыңнан астам баланы қамту жоспарланып отыр
«АМАNAT» партиясының мүшелері «Баланы мектепке даярлайық!» жалпыреспубликалық қайырымдылық акциясы аясында бүлдіршіндерді мектепке даярлауды жалғастыруда. Бұл туралы Azattyq Ruhy партияның баспасөз қызметіне сілтеме жасап хабарлайды.
Бүгін партия Орталық аппаратының басшысы Мәди Оспанов бірнеше отбасыға барып, балаларға мектеп формасын, спорт киімін, рюкзактар мен кеңсе тауарларын табыс етті.
«Бұл акция партияның «Бақытты отбасы» жобасы аясында бүкіл ел аумағында өткізіледі. Биыл акция аясында 30 мыңнан астам баланы қамтуды жоспарлап отырмыз. Басты мақсат – көпбалалы және аз қамтылған отбасыларға балаларын жаңа оқу жылына даярлауға көмектесу. Мариевскилер отбасына барғанымызда үйлерінің шатыры жанып кеткенін білдік. Сондықтан қосымша қолдау көрсетіп, жөндеу жұмысын жүргізіп беру туралы шешім қабылдадық», – деді Мәди Оспанов.
Өз кезегінде, көпбалалы ана Әсем Жайлаубекова партиялықтарға көмек көрсеткендері үшін алғысын білдірді.
«Отбасымызда мектеп жасындағы үш бала бар. Біреуі биыл бірінші сыныпқа барады. Оны мектепке даярлау үшін кем дегенде 100 мың теңге керек. Үлкен балаларды да даярлау қажет. Партияның қолдауымен қажеті заттың бәрін алдық», – деді ол.
Сондай-ақ, «AMANAT» партиясы республикалық қоғамдық қабылдау бөлмесінің меңгерушісі Әлия Садырбаева төрт оқушы қыз өсіп келе жатқан отбасыға қажетті заттарды табыстады.
«Бір-екі аптадан кейін жаңа оқу жылы басталады. Бұл мектеп жасындағы балалары бар әр отбасы үшін үлкен жауапкершілік. Мектепке баратын 5 перзентім бар. Сондықтан да оларды мектепке даярлаудың қаншалықты қиын екенін білемін. Барлығына сапалы мектеп және спорт формасы, аяқ киім, рюкзак, күнделік, дәптер және тағы сол сияқты заттар керек. Егер ата-ананың қажетті заттың барлығын сатып алуға мүмкіндігі болса тіпті жақсы. Бірақ, өкінішке қарай, бізде көмекке мұқтаж отбасылар көп. Сондықтан «AMANAT» партиясының «Бақытты отбасы» жобасы аясында жыл сайын «Баланы мектепке даярлайық!» акциясы өткізіледі. Бүгін біз ұжым болып оларға қажетті заттарды таңдап алдық. Қыздар өзін әдемі әрі сенімді сезінгенін қаладық. Оларды тек білім алу мәселесі алаңдатуы тиіс. Мақсатымызға жеттік деп ойлаймын. Олардың ақылды әрі батыл болып өсетініне сенімдімін», - деп атап өтті Әлия Садырбаева.