Сол сияқты 81 көшеге 30 шақырым арық салынатыны белгілі болды
Алматы әкімі Ерболат Досаев Алатау ауданының тұрғындарымен кездесу барысында құрылысы аяқталмаған тұрғын үйлердің сүрілетінін айтты, деп хабарайды Azattyq Ruhy.
Қала әкімі қазірігі уақытта Зерделі шағын ауданында тұрғындар үшін қауіпті екі нысанның бар екенін алға тартты.
«Тұрғындардың өтініші бойынша, жыл соңына дейін бұл үйлер сүріледі. 30 соттық жерге балалар алаңы мен жасыл саябақ аймағы салынады», - деді Ерболат Досаев.
Әкім, өзге де нысандарға сейсмо күшейту жұмыстары жүргізілетінін алға тартты. Сондай-ақ, Зерделі шағын ауданындағы қисайған үйлерді түзеу жұмыстары 23 үйге жүргізіліп, аяқталғанын мәлімдеді. Қалған 7 нысандағы мұндай жұмыс жыл соңына дейін бітеді деді.
Ал Момышұлы көшесіндегі жерасты өткелдері қазан айының соңына дейін қалпына келтірілмекші. Жыл соңына дейін аудандағы 81 көшеге 30 шақырым арық салынатыны да белгілі болды.