Жазатайым оқиғадан кейін кәсіпкерлерге абаттандыру жұмыстарын жүргізу тапсырылды
Рудный қаласында көшедегі қираған баспалдақтан құлаған қария ауруханада көз жұмды, деп хабарлайды Azattyq Rýhy.
18 сәуірде Рудныйда бұрынғы «Айгүл» кинотеатрының жанындағы баспалдақта қарт адамның құлап қалғаны туралы қалалық БАҚ-та ақпарат жарияланды.
Ескі баспалдақта сүрініп кеткен қария басын тасқа ұрып алған. Кейін ол қан кету салдарынан қалалық ауруханада көз жұмды.
Бүгін дүкендердің алдындағы аумақты, соның ішінде қираған баспалдақ маңындағы нысандарда жұмыс істейтін кәсіпкерлермен кеңес өтті.
«Мұндай жағдайларға болашақта жол беруге болмайды деген өзара түсіністікке қол жеткізілді. Кәсіпкерлер сатыларды теңестіру және тұтқаларды орнату жұмыстарын жүргізеді», деп көрсетті Рудный қаласының әкімдігі.