Көмек алған отбасылар аманаттықтарға ізгі тілектерін білдіріп, алғыс айтты
Мың айдан да қайырлы Рамазан айы – игілік, береке, кешірім, мейірім және қайырымдылық айы. Рамазан айының құрметіне «AMANAT» партиясы Павлодар облыстық филиалы мен облыстық мәслихаттың депутаттары аз қамтылған, тұрмысы төмен отбасыларға қолдау білдіріп, қаржылай көмек пен азық-түлік себеттерін үлестірді, деп хабарлайды Azattyq Rýhy партияның баспасөз қызметіне сілтеме жасап.
«AMANAT» партиясының «Халыққа көмек» партиялық жобасы әлеуметтік тұрғыдан қолдауды қажет ететін азаматтарға барынша көмек қолын созуды мақсат етеді.
Партияластар Қасиетті Рамазан айында 30 отбасыға қайырымдылық көмегін көрсетті. Көмекке мұқтаж сондай жандардың бірі – жалғыз тұратын 71 жастағы Нұрбибі Шәукебаева. Павлодар трактор зауытының шойын құю цехында 30 жылдай қызмет еткен зейнеткер әйел затына тән емес ауыр жұмыс істеп, денсаулығынан айырылған.
«Қазір өмір сүру өте қиын. Бірақ елімізде «AMANAT» сияқты партия бар екеніне алғысымды білдіремін. Бұл – патриоттық партия. Әсіресе партия біз сияқты әлсіз қарттарға көмектесіп келеді. Мен елімізге және «AMANAT» партиясына жаңа табыстар, шабыт тілегім келеді, сіздерді қолдайтын халық көп болсын деп тілеймін», - деп ықыласын білдірді Нұрбибі Шәукебаева.
Аманаттықтар мүгедіктігінен жағдайы нашарлап кеткен Наталья Александроваға барды. Наталья Александрованың денсаулығы мүшкіл болғанына қарамастан, қиындықтармен күресуге, өмір сүруге деген талпынысы көңілді қуантады.
«Үйім жалға алынған, анам қайтыс болды, мен екі жыл бойы мемлекеттік баспаналарда тұрдым, енді бір жарым жыл бойы бөлме жалдап тұрып жатырмын. Үшінші топтағы мүгедек болған соң, мүгедектер үйіне орналастырмайды. Маған тағы да үш ота жасату қажет. Депутаттарға алғысым шексіз, кеше маған балдақ алып берді, бүгін азықпен қамтамасыз етті. Нағыз бақыт – өз ішіңдегі күш», - дейді Наталья Александрова.
Көмек алған отбасылар аманаттықтарға ізгі тілектерін білдіріп, алғыс айтты.
«Шынында да, бұл адамдар қиын өмірлік жағдайға тап болды. Олар – партияның Павлодар облысындағы қоғамдық қабылдау бөлмесіне өтініш білдіргендер. Біздің аудандық филиалдарымыз да осындай бастаманы қолға алды. Біздің міндетіміз – адамдарға, азаматтарымызға көмектесу, бұл бізге артылған жауапкершілік және қасиетті Рамазан айында партия белсенділік танытуы тиіс деп санаймын», - деді партияның облыстық филиаланың атқарушы хатшысы Илья Теренченко.
Бұл іс-шараға облыстық мәслихаттың депутаттары, «Jas Otan» жастар қанатының белсенділері, партияның облыстық филиалының қызметкерлері мен бастауыш партия ұйымдары етене араласып, мұқтаж жандарға азық-түлік себеттерін таратуды қолға алды.