Полиция жол апаты фактісі бойынша қажетті сараптаманы тағайындады
Алматы облысында 80 жастағы зейнеткердің әрекеті салдарынан үш көлік соқтығысты, бір адам қайтыс болды. Бұл туралы Алматы облысы ПД баспасөз қызметі мәлім етті, деп хабарлайды Azattyq Rýhy.
Оқиға орнында түсірілген видео әлеуметтік желіде жарияланды. Видеода жол апатына түскен үш көлік түсірілген: екі көлік жолдың үстінде, бірі жол жиегінен шығып кеткен. Видео авторы оқиға Алматы – Бақанас автожолында болғанын айтады.
Алматы облысының полиция департаменті бұл фактіні растады. Алдын ала болжам бойынша апат көлік тізгініндегі 80 жастағы зейнеткердің әрекеті салдарынан болған.
"Volkswagen Golf, Volkswagen Getta және Mitsubishi Galant автокөліктері жол апатына түсті. Автокөліктің бірінің рөліндегі қарт жүргізуші алдындағы көліктен озамын деп қарсы бағытта келе жатқан автокөлікпен соқтығысқан, одан кейін инерциямен бір бағытта келе жатқан автокөлікпен соқтығысқан", - деп хабарлады Алматы облысы ПД баспасөз қызметі.
Жол апаты салдарынан бір адам қаза тауып, үш адам жарақат алды. Зардап шеккендер Қапшағай ауруханасына жеткізілді.
Полиция жол апаты фактісі бойынша қажетті сараптаманы тағайындады. Қылмыстық кодекстің 345-бабының 3-бөлігі бойынша тергеу басталды.