Петропавлда мас күйде аялдамада ұйықтап қалған шенеунік қызметінен босатылды

Оның 2020 жылы мас күйінде көлік тізгіндегені және өз көлігін мас адамға жүргізуге бергені анықталған

Петропавлда мас күйде аялдамада ұйықтап қалған шенеунік қызметінен босатылды

Петропавлда мас күйде аялдамада ұйықтап қалған шенеунік қызметінен босатылды. ҰЭМ Табиғи монополияларды реттеу комитетінің Солтүстік Қазақстан бойынша департамент басшысы Абай Балабековке қатысты іс тәртіптік кеңесте қаралды, деп хабарлайды Azattyq Rýhy тілшісі.

Оқиға өткен жылдың қараша айында болған. Автобус аялдамасында алаңсыз ұйықтап жатқан мемлекеттік қызметшіні патрульдік полиция тауып алған. Онлайн өткен кеңесте айыпты жүрек талмасы болғандықтан көшеде жатқанын айтып ақталды.

«Мен бала кезден жүрек ауруына шалдыққанмын, диспансерлік тіркеуде тұрмын. Тыныс алу жолдарында да ақау бар. Үйге бармақ болып такси шақырттым, келмеді. Автобус аялдамасында қоғамдық көлік күттім. Сағат 22.00 шамасы болатын. Спирттік ішімдіктен бар-жоғы 300 грамм алған едім. Аялдамада көзімді жай ғана жұмып жатқан едім. Полиция тап болды», - дейді Арман Балабеков.

Алайда медициналық куәландыру шенеуніктің спирттік ішімдікке тойып алғанын көрсеткен. Тәртіптік кеңес мүшелері оны қызметінен босату жөнінде ұсынысты дауысқа салды.

«Арман Балабеков әдеп кодексінің нормаларын бірінші рет бұзып отырған жоқ. 2020 жылы мас күйінде көлік тізгіндегені және өз көлігін мас адамға жүргізуге бергені анықталған еді. Кеңес мүшелері бір ауыздан шенеунікті қызметінен босату жөнінде ұсыныс жасау шешімін қабылдады», - дейді мемлекеттік қызмет істері агенттігінің СҚО бойынша департаментінің бас маманы  Махаббат Самрат.

Мамандардың айтуынша мемлекеттік қызмет жөніндегі департаментке түсетін шағымдардың басым көпшілігі блогерлерден келеді. Олар жұмыс уақытынан тыс көшеде жүрген қызметтік көліктерді суретке түсіріп, сенім поштасына жолдайды.

×
Бұл желілік ресурстың ақпараттық өнімдері 18 жастан асқан адамдарға арналған.