Azattyq Rýhy тілшісі «Еркін сөз» байқауында бас жүлдеге ие болды

Алматыда «Еркін сөз» байқауының жеңімпаздары анықталды. Қаржы тақырыбында материал жазған үздік журналистер қомақты қаржылай сыйлыққа ие болды. Құрылғанына 7 жыл толған  Түркітілдес журналистер қоры халықтың қаржылық сауатын көтеруге арналған тақырыптарда материал дайындаған журналистер арасында байқауды осымен 5 жыл қатарынан өткізді. Марапаттау шарасында коронавирустан қайтыс болған ардагер журналистердің атындағы арнайы сыйлықтар да табысталды, деп хабарлайды Azattyq Rýhy тілшісі.

«Биылғы жылдың ерекшелігі: мәңгілік мекенге ерте аттанған әріптес аға-әпкелеріміздің атындағы арнайы сыйлықтардың тағайындалуы. Қазақ журналистикасының дамуына орасан зор үлес қосқан журналистер туралы арнайы бейнематериал дайындадық. Сондай ақ, 8 журналиске Аманхан Әлім, Қуандық Шамахайұлы, Жолдасбек Дуанабай, Бақытгүл Мәкімбай, Бейсен Құранбек, Амангелді Сейітхан, Айнұр Сыдықова, Сәкен Орынбасарұлы атындағы арнайы сыйлықтар табыстадық. Байқауды Түркітілдес журналистер қоры Halyk Bankтің қолдауымен өткізді», - деді Қордың Президенті Нәзия Жоямергенқызы.

«Еркін сөз-2021» байқауында «Үздік мақала», «Сайттағы үздік мақала», «Үздік телесюжет» номинациялары бойынша 11 жүлдегер болды. Әр аталым бойынша тағайындалатын Бас жүлде – 500 000 теңге.

Конкурс жеңімпаздары:

• «Үздік мақала» номинациясы бойынша бас жүлде иегері – Azattyq Rýhy ақпарат агенттігінің тілшісі Еркежан Айтқазы;
• «Үздік телесюжет» номинациясы бойынша бас жүлде иегері – «Қазақстан» ұлттық телеарнасының тілшісі Амангелді Сейітхан;
• «Сайттағы үздік мақала» номинациясы бойынша бас жүлде иегері – «Ult.kz» сайтының тілшісі Ақбота Мұсабекқызы;
• Аманхан Әлім атындағы арнайы сыйлықтың иегері – «Ақ желкен» журналының тілшісі Балжан Мұратқызы;
• Қуандық Шамахайұлы атындағы арнайы сыйлықтың иегері – «Біздің Қостанай» газетінің тілшісі Сералы Мырзабай;
• Жолдасбек Дуанабай атындағы арнайы сыйлықтың иегері – «Егемен Қазақстан» газетінің тілшісі Фархат Әміренов;
• Бақытгүл Мәкімбай атындағы арнайы сыйлықтың иегері – «Қазақ үні» газетінің тілшісі Гүлмира Садықова;
• Айнұр Сыдықова атындағы арнайы сыйлықтың иегері – «Жас Алаш» газетінің тілшісі Қарлығаш Зарыққанқызы;
• Сәкен Орынбасарұлы атындағы арнайы сыйлықтың иегері – kaznews.kz сайтының тілшісі Айбала Нұрлан;
• Бейсен Құранбек атындағы арнайы сыйлықтың иегері – «Алматы» телеарнасының тілшісі Мерей Қанапиянов;
• Амангелді Сейітхан атындағы арнайы сыйлықтың иегері – «Еуразия» арнасының тілшісі Нұрай Құрақпай.

Түркітілдес журналистер қоры – 2014 жылы құрылған. Мақсаты – түркі әлемі мен қазақстандық журналистер арасындағы кәсіби бірлігі мен білігін арттыру, ортақ жобалар жасау. Отандық және шетелдік мамандардың қатысуымен журналистерге арналған семинар-тренингтер, вебинарлар, форумдар, шеберлік сабақтары, конференциялар, байқаулар ұйымдастыру.