«Өкініштен көзіме жас келді»: Олимпиада жүлдегері Софья Берульцева жеңісін ұстазына арнады

Кеше, яғни 7 тамыз күні қазақстандық каратеші Софья Берульцева Олимпиада ойдындарынан ел қоржынына қола жүлдені салды. 20 жастағы спортшы топтық кезеңде үздік атанып, уақытынан бұрын жартылай финалға жолдама алды. Алайда жартылай финалда египеттік Ферьял Абделазизге 5:4 есебімен жол беріп, қола жүлдені қанағат тұтты, деп жазады Olympic.kz.

Жарыстан кейін журналистерге берген сұхбатында спортшы ой бөлісіп, көзіне жас алды.

«Әрине, қуаныштымын. Бірақ финалға шығуға болатын еді. Барымды салдым. Кішкене жетпей қалды... Финалға аздап жетпей қалғанда, өкініштен көзіме жас келді.

Бүгінгі қарсыластарымның ешқайсысымен осы уақытқа дейін жарыста кездескен емеспін.  

Жартылай финалда бір-екі соққы алғаннан кейін біршама тапырақтап қалдым. Бұл жерде төрешіні де, ешкімді де кінәлай алмайсың. Бәрі әділ өтті. Нәтижесі осы», - дейді каратеші.

Софья Берульцева Олимпиада ойындарына жолдаманы соңғы сәтте алды. Ол каратеден рейтинг бойынша да, лицензиялық жарыста да ұтылып қалып, Олимпиада жолдамасынан тыс қалған болатын. Алайда Азия аймағында олимпиадалық циклда әйелдер арасында ең көп ұпай жинаған спортшы ретінде Халықаралық карате федерациясының D3 картасына ие болып, Токио Олимпиадасына қатысуға мүмкіндік алды.

«Жолдаманы соңғы сәтте алғаным өзіме жақсы болды. Көбісі рейтинг бойынша жолдамаға ие болып, біраз жарыстарға қатыспай жүрді. Біз жарысты да, жаттығу жиындарын да тоқтатқан жоқпыз. Өз формамызды сақтап, соңғы сәтке дейін дайындалдық. Осы тұрғыдан жолдаманы соңында алғанның мен үшін пайдасы көп болды», - дейді ол.

Софьяның медалі - каратеден Қазақстан құрамасының Токио олимпиадасындағы екінші жүлдесі. Ол каратеден Олимпиада ойындарында әйелдер арасында  жүлде алған тұңғыш қазақстандық спортшы ретінде ел спортының тарихына енді. Каратеші Олимпиаданың қола жүлдесімен тоқтап қалмайтынын жеткізді.

«Бізге мұнымен тоқтауға болмайды. Алда Азия және әлем чемпионаты күтіп тұр. Біраз демалыстан кейін қалпымызға оралып, жаттығуымызды әрі қарай жалғастырамыз», - дейді спортшы.

20 жасар жанкешті Софья бүгінгі жүлдесін марқұм ұстазы Жасталап Санауовқа арнады. Каратеден Қазақстан ұлттық құрамасының бас бапкері болған Жасталап Санауов 2020 жылдың 31 желтоқсанында мезгілсіз дүниеден өткен еді.

«Жасталап ағаның озғаны бәрімізге өте қатты әсер етті. Біздің осы Олимпиадаға келуіміз үшін барын салды. Бізге де көмектесті, федерацияға да көмектесті. Медалімді соған (Жасталап Санауовқа) арнаймын», - деп көзіне жас алды София.