ШұғылҚазақстанда өткен тәулікте КВИ жұқтырғандар саны күрт өсті

Павлодар – Семей учаскесі жүк көліктері үшін ақылы болады

Ақылы учаске бойынша жол ақысын екінші деңгейдегі банктер арқылы төлеуге болады

«Нұрлы Жол» инфрақұрылымды дамыту мемлекеттік бағдарламасына сәйкес биыл Шығыс Қазақстан облысында РФ шекарасы (Омбы) – Майқапшағай автожолының Павлодар облысының шекарасынан Семей қаласына дейінгі учаскеде (587-733 шақырым) ақылы жүйе іске қосылады, деп хабарлайды Azattyq Rýhy.

Мемлекеттік бағдарламаны жүзеге асыру жоспарының негізінде, Қазақстан Республикасының Индустрия және инфрақұрылымдық даму министрлігі мен «QazAvtoJol» ҰК» АҚ бірлесіп төлем алудың «ашық жүйесін» енгізу туралы шешім қабылдады.

Жүйенің ерекшелігі – учаскелерде шлагбаумдар болмайды. Автокөліктердің жүріп өткен жолы туралы ақпарат аркаларда орналасқан арнайы камералар арқылы тіркеледі.

Павлодар – Семей учаскесі ІІ техникалық санаттағы автожол болғандықтан, тек жүк көліктерінен ғана төлем алынатын болады.

«Ақылы учаске бойынша жол ақысын екінші деңгейдегі банктер (Каспи,   Хоумбанк және т.б. сияқты интернет-банкинг қосымшаларын қоса санағанда), төлем терминалдары (Qiwi, woopay), сондай-ақ Кселл, Актив, Билайн мобильді байланыс операторларымен SSID код жіберу  арқылы төлеуге болады.  Жалпы автокөліктің жеке шотын толтырудың 20-дан астам тәсілі бар. Толық ақпарат qaj.kz сайтында жарияланған.

Сондай-ақ, жүргізушілер мен жолаушылардың қолайлығы үшін біздің мамандар КАЖ Мобайл атты мобильдік қосымшаны жасап шығарды. Бүгінде, бұл қосымша арқылы жеке шоттағы қаражатты, жүріп өткен жол туралы ақпаратты білуге болады. Кері байланыс та бар», - делінген «ҚазАвтоЖол» баспасөз хабарламасында.

Алдағы уақытта А пунктінен Б пунктіне дейінгі маршрутты есептеу (ұзындығы мен бағасы), жол бойындағы барлық сервис нысандары көрсетілген интерактивті карта мен PUSH хабарландырулар да іске қосылады.

Ақылы учаскеге қатысты барлық мәселелер бойынша пайдалы ақпарат беру үшін Семей қаласының шығаберісінде клиенттермен жұмыс істеу орталығы іске қосылады. Сондай-ақ, 1403 нөміріндегі байланыс орталығына да хабарласуға болады.