Тек АҚШ-тың өзінде КВИ құрбандарының саны 570 мыңға жуықтап қалды
Әлемде коронавирустан көз жұмғандар саны 3 миллиондық межеден асып кетті, деп хабарлайды Azattyq Rýhy 24kz-ке сілтеме жасап.
Рейтер агенттігінің мәліметінше, жыл басында ғана бұл көрсеткіш 2 миллион еді. Алайда соңғы 3 ай ішінде тағы бір миллионға артқан. Антирейтингте бірінші орында АҚШ тұр. Мұнда індет құрбандарының саны 570 мыңға жуықтап қалды.
Екінші және үшінші орында Бразилия мен Мексика. Сарапшылар Бразилиядағы ахуал күрделі екенін айтады. Қазір әлемде коронавирустан көз жұмып жатқан әрбір төртінші науқас осы елде тіркеліп отыр. Салдарынан жергілікті денсаулық сақтау жүйесінде дағдарыс туындаған. Жансақтау бөлімдерінде орын тапшы. Ал Еуропаға келсек, мұнда кісі өлімінің шамамен 60 проценті 5 мемлекетте тіркеліп отыр. Бұл - Ұлыбритания, Ресей, Франция, Италия мен Германия.