Жоғарғы сотта әкімшілік істер жөніндегі алқа құрылады

Мәжіліс сот жүйесі мен судьялардың мәртебесі туралы конституциялық заңға енгізілген түзетулерді бірінші оқылымда мақұлдады. Түзетулер Жоғарғы сотта әкімшілік істер жөніндегі алқаны құруды және Жоғарғы сот төрағасы мен судьяларының лауазымына үміткерлерге қойылатын талаптарды өзгертуді көздейді, деп хабарлайды Azattyq Rýhy тілшісі.

«Әкімшілік рәсімдік-процестік кодексті қабылдау және оны 2021 жылғы 1 шілдеден бастап қолданысқа енгізу сот жүйесінің жұмысына түзетулер енгізуді талап етті. «ҚР сот жүйесі мен судьяларының мәртебесі туралы» конституциялық заңда белгіленген ҚР Жоғарғы сотының және облыстық соттардың қолданыстағы құрылымы Әкімшілік рәсімдік-процестік кодекстің міндеттеріне жауап бермейді», - деді депутат Қанат Мусин.

Заң жобасы түзетулердің екі блогынан тұрады.

Жоғарғы сотта әкімшілік істер бойынша сот алқасын құру ұсынылды. Мусиннің айтуынша, қазіргі мамандандырылған сот алқасы жойылады. Облыстық соттарда да тиісті сот алқалары құрылатын болады. Бұл шара сот жүйесіне өңірлерде істердің бөлінуіне байланысты үнемі өзгеріп отыратын жағдайға жедел ден қоюға мүмкіндік береді деп күтілуде.

«Сондай-ақ, заң жобасы Жоғарғы сот төрағасы және Жоғарғы сот судьясы лауазымына үміткерлерге қойылатын талаптарға қатысты өзгерістер енгізеді, оларды мемлекет басшысы ұсынады. Көрсетілген судья лауазымдарына сайлау үшін Республика Президенті ұсынған адамдардың негізінен жеткілікті тәжірибесі бар, тәжірибелі мамандар болып табылатындығын ескере отырып, заң жобасында олардың біліктілік емтиханынан өтуі туралы қолданыстағы ережені алып тастау және заң мамандығы бойынша кемінде жиырма жыл жұмыс өтілінің болуы туралы талаптың күшін жою ұсынылады.

Бұл неғұрлым даулы істер бойынша сот төрелігінің сапасын қамтамасыз етуге мүмкіндік береді және бүкіл сот жүйесіне оң әсерін тигізеді», - деді Қанат Мусин.

Депутаттың айтуынша, енгізілетін нормалар әкімшілік әділет енгізудің бастапқы кезеңінде жүктемені тең бөлуге, сондай-ақ Әкімшілік құқық бұзушылық және жария даулар туралы істерді қарау бойынша сот практикасының аражігін ажыратуға мүмкіндік береді.

Сымбат Ғалымжан, Нұр-Сұлтан