Бас лицензиясынан айырылған Тынышпаев атындағы академия студенттері мен ұстаздары қайда барады?

Екі күн бұрын ғана бас лицензиясынан айырылған Алматы қаласындағы М.Тынышпаев атындағы Қазақ көлік және коммуникациялар академиясының ұстаздары мен студенттері басқа аналогты оқу орнына ауысу мүмкіндігіне ие. Бұл туралы ОКҚ алаңында өткен брифингте Қазақстан университеттері қауымдастығының президенті Рахман Алшанов мәлім етті.

Сондай-ақ, қауымдастық президенті оқу орнының бас лицензиясынан айырылуына әсер еткен факторларды атап өтті.

«Тынышпаев атындағы оқу орнына жуырда 90 жыл толады және соңғы 30 жылда ол жеке академия болды. Осы уақыт аралығында мекемеге көп жағдай жасалды, оқу орнының материалдық базасы өте жақсы еді. Сондай-ақ, академия ҚТЖ басқармасында болды, кейіннен олар ЖОО-ны сатып жіберді. Аз уақыт аралығында 5 ректор ауысып, шағын кәсіпорынның басқаруына өткен. Заңбұзушылықтар өте көп. Атап айтар болсам, ұстаздардың жартысынан көбі жоқ, оқу саласындағы сапа көрсеткіші 20-30% азайған. Сол себепті Көлік және коммуникация академиясына қатысты шешімді сотта шығаруға болады. Студенттер мен ұстаздардың басқа аналогты оқу орнына ауысуға мүмкіндіктері бар. Неге екенін, осы мәселеде ҚТЖ үнсі отыр. Бұрынғы ректорлардан «Неліктен мұндай жағдайға жеттіңіздер?» деп сұрағанымда, олар ЖОО иелігін білім саласынан хабары жоқ адамдар алғанын айтты. Шағын кәсіпорын бүтін бір академияны басқаруды қолға алған, бұл қалай болғанын түсінбедім. Үлкен университетті осындай жағдайға жеткізгені ренішті жағдай. Мәселенің бәрі басқаруда болып тұр. Министрлікпен дауласпай, қателіктерін жөндеуі қажет еді», - деп атап өтті Алшанов.

Рахман Алшанов академия өз құқын заңды түрде қорғай алатынын да атап өтті. 

«Министрлік сіздердің түлектеріңіз бәсекеге қабілетті емес деп өз талаптарын қойғанда, ЖОО БҒМ арқылы болсын, сот арқылы болсын, өзін қорғайды. Оның үстіне, лицензиядан айырмас бұрын,  ескерту беріледі, уақытша тоқтатылады, содан кейін ғана жабылады. Университет ректорының командасы өзінің объективті жұмысын көрсететін болса, онда бұл мәселе талқыланбас еді», - деді ол.

Айжан Қалиева, Нұр-Сұлтан