Петропавлда бірыңғай велосипед базасы құрылды
Мұндай жаңашылдық елдің басқа қалаларында жоқ
Петропавлда жыл басынан 79 велосипед ұрланған. Оның 41 фактісі ғана ашылды. Ұрлықтың алдын алу мақсатында жергілікті полиция қызметі велосипедтердің бірыңғай базасын жасады. Мұндай жаңашылдық елдің басқа қалаларында жоқ, деп хабарлайды Azattyq Rýhy тілшісі.
Ұрлықтың алдын алу үшін қалалық полиция басқармасының қызметкерлері велосипедтердің бірыңғай базасын құрды. Мамыр айынан бері жұмыс істей бастаған ақпараттық базаға кез келген адам өзінің екі дөңгелекті көлігін тіркей алады.
«Велосипедтің маркасын, түсін, сериялық нөмірін көрсетіп, сауалнама толтыру арқылы кез келген азамат өзінің велосипедін тіркей алады. Сондай-ақ велосипедті тұрғылықты аумағы бойынша орналасқан учаскелік полиция пунктерінде де тіркеуге болады», - дейді Петропавл қалалық полиция басқармасының жедел уәкілі Жеңісгүл Бейсембина.
Мамандардың айтуынша, аталған базада тіркелген велосипедтердің ішінде қолды болып, табылғандары да бар. Ұрылар көп жағдайда үй мен дүкендердің маңынан немесе подъездердің кіреберісінде қалған велосипедтерді алып кетеді екен. Қылмыстың бұл түрі үшін бас бостандығынан айыру жазасы кесілуі мүмкін.
Ұрлықтың алдын алу мақсатында құрылған базаға бүгінгі күнге дейін 1158 адам тіркеліп үлгерген.
Эльмира Мәмбетқызы, СҚО
