Турнирге Еуропаның ең озық университеттерінен 168-ден астам команда жиналды
Назарбаев университетінің түлектері студенттік пікірсайыс бойынша Еуропа чемпионатының (European Universities Debating Championship) жартылай финалына шықты. Әлішер Жүзгенбаев пен Мұхтар Ташкенбаев («NU А» командасы) Қазақстан тарихында алғаш рет негізгі жартылай финалға және «ағылшын тілі – екінші тіл ретінде» санатында 1/4 финалға жолдама алды.
COVID-19 пандемиясына байланысты Нұр-Сұлтан қаласында өтетін турнирді онлайн форматқа ауыстыруға тура келді. Осыған қарамастан, пікірсайыс қызықты және бәсекелі түрде өтті. Биыл турнирге Еуропаның ең мықты университеттерінен 168-ден астам команда жиналды.
«Турнирге атақты университеттердің көптеген командалары қатысты. Мәселен, Оксфорд немесе Кембридж, бірақ біз оларды іріктеу раундтарының командалық есебінде де, плей-офф кезеңінде де айналып өте алдық», - деп атап өтті «NU А» командасының мүшесі Мұхтар Жүзгенбаев.
Назарбаев университетінің атынан 7 команда: Әлішер Жүзгенбаев пен Мұхтар Ташкенбаев (NU A), Адэля Дәулетқызы мен Назерке Мухлиссова (NU B), Самат Саяқов пен Нұрлан Мұратбек (NU C), Дмитрий Беседин мен Әмірлан Қасымов (NU D), Қанат Исламбеков пен Нұрсат Құлымқанов (NU E), Тілеухан Мусин мен Айнагүл Әлжанова (NU F), сондай-ақ Ләззат Төлеутай мен Әли Дүйсебаев (NU G) қатысты.