Қарағандыда көпқабатты тұрғын үй өртенді: 15 адам құтқарылды

Қарағанды қаласындағы көпқабатты тұрғын үйлердің бірінен өрт шығып, құтқарушылар жедел әрекеттің арқасында 15 тұрғынды қауіпсіз жерге шығарды, деп хабарлайды Azattyq Rýhy.

Төтенше жағдайлар министрлігінің мәліметінше, оқиға Әлихан Бөкейхан ауданы, Мамыраев шағын ауданында болған. Тоғыз қабатты тұрғын үйдің төртінші қабатындағы пәтерде жиһаздар мен үй заттары отқа оранған.

ТЖМ күштері оқиға орнына жедел жетіп, барлау және өртті сөндіру жұмыстарына кірісті. Арнайы құтқару қалпақтарының көмегімен 8 адам, оның ішінде 5 бала қауіпсіз жерге шығарылды. Тағы 7 тұрғын баспалдақ арқылы эвакуацияланды. Өрт қысқа уақыт ішінде сөндіріліп, зардап шеккендер мен жарақат алғандар тіркелген жоқ.