Репетиторлық орталықтарды шектеу  мәселені шешпейді – Аймағамбетов өз ұсыныстарын айтты

Экс-министр, Құрылтай депутаты Асхат Аймағамбетов репетиторлық орталықтардың жұмысын шектеу білімге деген сұранысты жоймай, қосымша сабақтардың қымбаттауына және қолжетімділіктің төмендеуіне әкелуі мүмкін екенін айтты, деп хабарлайды Azattyq Rýhy 

Ол бұл туралы Telegram арнасында жазды.

Оның айтуынша,  репетиторлық орталықтарға қатысты жиі шағым айтылады. Олардың жұмысына тыйым салу, қызметін қатаң реттеу керек деген ұсыныстар да бар. Бірақ, депутат атап өткендей, бұл нарықтың дамуына мектеп мен мұғалімдерді кінәлайтындар, конкурстық іріктеу арқылы қабылдайтын оқу орындарымен  байланыстыратындар бар.

«Конкурстық іріктеуі бар оқу орындары мүлде болмаған күннің өзінде, сапалы білім алуға деген ұмтылыс жоғалып кетпес еді. Балалар бәрібір ҰБТ-ға, SAT-қа, олимпиадаларға және шетелдік университеттерге түсуге дайындалар еді. Өйткені біздің оқушыларымыз әлемнің әртүрлі еліндегі құрдастарымен көбірек бәсекеге түсіп жатыр. Мұндай жағдайда жақсырақ дайындалуға ұмтылу табиғи нәрсе», – деп жазды Асхат Аймағамбетов.

Сонымен бірге ол екі жағдайды ажырату қажет екенін атап өтті. Егер бала мектеп бағдарламасын меңгеру үшін репетитор жалдауға мәжбүр болса, бұл мектеп үшін маңызды белгі. Ал қосымша сабақтар жоғары оқу орнына түсу немесе халықаралық емтихандарға дайындалу мақсатында қажет болса, мәселенің сипаты басқа.

Асхат Аймағамбетов Оңтүстік Корея мен Қытай тәжірибесін мысалға келтірді. Оның жазуынша, Оңтүстік Кореяда жеке репетиторлыққа салынған тыйым кейін алынып тасталған. Ал Қытайда негізгі мектеп пәндері бойынша коммерциялық репетиторлық қызмет қатаң шектелгенімен, қосымша сабақтарға сұраныс сақталған. Кей орталықтар қызметін басқа атаумен көрсетіп, сабақтарды бейресми түрде ұйымдастыруға көшкен.

Осы ретте Асхат Аймағамбетов репетиторлық орталықтарға жаппай тыйым салудың орнына бірнеше шара қарастыруды ұсынды:

• Біріншіден, қаражатты қайтару тәртібінде нақты көрсетілген түсінікті келісімшарттар болуы керек. Сондай-ақ «грантқа міндетті түрде түсіреміз» немесе «оқуға түсуге кепілдік береміз» деген жарнамаларға жол бермеу қажет.
• Екіншіден, табысы төмен отбасылардың балаларына және ауылдық жерлердегі оқушыларға түсу емтихандарына тегін әрі сапалы дайындалуға мүмкіндік жасау керек. Оның ішінде онлайн форматта да қажет.
• Үшіншіден, НЗМ, НУ және конкурстық іріктеу арқылы қабылдайтын басқа да оқу орындарына түсу тек merit-based қағидатына ғана емес, need-based тәсілдеріне де сүйенуі керек. Яғни академиялық талаптар сақталуы тиіс, бірақ әлеуметтік және аумақтық жағдайларды да кеңірек ескеріп, дайындық бағдарламаларын дамыту, ауыл балалары мен әлеуметтік осал отбасылардан шыққан балаларға арналған ойластырылған квоталарды кеңейту қажет.
• Төртіншіден, түсу емтихандарының өзін де жетілдіру керек. Олар отбасының баланы дайындауға қанша қаражат жұмсағанын емес, баланың қабілетін, ойлауын және әлеуетін көбірек бағалауы тиіс.