Су ресурстары және ирригация министрі Нұржан Нұржігітов су қоймасының құрылыс барысымен танысты
Үкімет су қауіпсіздігін қамтамасыз ету және су шаруашылығы инфрақұрылымын жаңғырту саласында Мемлекет басшысының тапсырмаларын орындау бойынша жүйелі жұмысты жалғастыруда. Міндеттердің жүзеге асырылу барысын тексеру мақсатында Су ресурстары және ирригация министрі Нұржан Нұржігітов Түркістан облысындағы жаңа «Бәйдібек ата» су қоймасының құрылыс барысымен танысты, деп хабарлайды Azattyq Rýhy.
Сыйымдылығы 68 млн м³ болатын су қоймасы Бөген өзенінің көктемгі ағынын жинақтап, вегетациялық кезеңде қосымша су қорын пайдалануға мүмкіндік береді. Нысанның жалпы аумағы — 220 га, ал бөгеттің ұзындығы — 3,9 шақырым. Су қоймасы іске қосылғаннан кейін 9,7 мың га суармалы жер қосымша ағын сумен қамтамасыз етіледі.
Қазіргі уақытта нысанның дайындық деңгейі 86% жеткен. Құрылыс жұмыстарын ағымдағы жылдың соңына дейін толық аяқтау жоспарланып отыр. Жиналған су ауыл шаруашылығы қажеттіліктері үшін Бөген су қоймасына бағытталады.
Өңірдегі және республикадағы басқа да су инфрақұрылымы жобалары бойынша ауқымды жұмыстар жүзеге асырылып жатыр. Түркістан облысының Төле би ауданында сыйымдылығы 1,2 млн м³ болатын «Қарақуыс» су қоймасының құрылысы аяқталып, ол 500 га суармалы жерді сумен қамтамасыз етуге мүмкіндік береді. Сонымен қатар Ислам даму банкімен бірлескен жобалар аясында Жамбыл облысында «Ақмола», Қызылорда облысында «Қараөзек» және Батыс Қазақстан облысында «Үлкен Өзен» сияқты тағы 3 жаңа су қоймасының құрылысы басталып, қазіргі таңда бұл үш нысан бойынша да конкурстық рәсімдер жүргізілуде.