Астана қаласында партия өкілдері Ана мен бала орталығының ұжымымен кездессе, Солтүстік Қазақстанда медицина қызметкерлерінің мәртебесін арттыру және отбасыларды қолдау мәселелері көтерілді. Ал Атырау облысында кандидаттар шалғайдағы Айбас ауылының тұрғындарымен кездесіп, олардың ұсыныстарын тыңдады
«Әділет» партиясының сайлауалды науқаны аясында партия өкілдері мен Құрылтай депутаттығына кандидаттар медицина қызметкерлерімен, еңбек ұжымдарымен және өңір тұрғындарымен кездесулер өткізді. Кездесулер барысында медициналық көмектің сапасы мен қолжетімділігі, еңбек жағдайлары, жұмыспен қамту, отбасыларды қолдау, абаттандыру және ауылдық аумақтарды дамыту мәселелері талқыланды, деп хабарлайды Azattyq Rýhy.
Астана қаласында «Әділет» партиясы өкілдерінің University Medical Center корпоративтік қорының Ана мен бала орталығы ұжымымен кездесуі өтті. Кездесуге қатысушылар денсаулық сақтау, ана мен бала денсаулығын қорғау, сондай-ақ медициналық көмектің сапасы мен қолжетімділігін арттыру мәселелерін талқылады.
Кездесуге «Әділет» партиясынан Құрылтай депутаттығына кандидат Жұлдыз Данбаева, партияның Астана қалалық филиалы хатшысының орынбасары Мария Мухтаровна, кандидаттың сенімді өкілі Нәжен Сәрсембеков, сондай-ақ University Medical Center корпоративтік қорының басқарма төрағасы, Қазақстанның Еңбек Ері, медицина ғылымдарының докторы, профессор Юрий Пя қатысты.
Кездесу барысында ұжымға партияның денсаулық сақтау саласындағы сайлауалды бағдарламасының негізгі бастамалары таныстырылды. Ана мен бала денсаулығын нығайтуға, аурулардың алдын алу және ерте диагностиканы дамытуға, медициналық қызметтердің сапасын арттыруға, сондай-ақ заманауи емдеу мен оңалтудың мүмкіндіктерін кеңейтуге ерекше назар аударылды.
Профессор Юрий Пя медицинаның дамуы сапалы білім мен жоғары білікті мамандарды даярлаумен тікелей байланысты екенін атап өтті.
«Сапалы медицина мықты білім мен мамандардың кәсіби даярлығынан басталады. Қазақстанның медициналық мектептерін қолдау, жас дәрігерлердің, ғылымның дамуына және тәжірибе алмасуына жағдай жасау маңызды. Медициналық білім беру жүйеміз қаншалықты мықты болса, пациенттер алатын медициналық көмектің сапасы да соншалықты жоғары болады. Сондықтан білім мен кадр даярлауға салынған инвестиция – ең алдымен адам денсаулығына салынған инвестиция», – деді Юрий Пя.
Кездесу ашық диалог форматында жалғасты. Медициналық қызметкерлер саланың өзекті мәселелеріне қатысты өз пікірлері мен ұсыныстарын білдірді. Қатысушылар денсаулық сақтау жүйесін жетілдіру кезінде кәсіби қауымдастықпен тұрақты өзара іс-қимылдың маңыздылығын атап өтті.
Петропавл қаласында «Әділет» партиясының өкілдері «ПВЗ» ЖШС ұжымымен кездесті. Кәсіпорын қызметкерлері күнделікті өмірге тікелей қатысты жұмыспен қамту, табыс, отбасыларды қолдау, абаттандыру және әлеуметтік қызметтердің қолжетімділігі мәселелерін көтерді.
Құрылтай депутаттығына кандидаттар мен партияның сенімді өкілдері бұл мәселелер бойынша партияның сайлауалды бағдарламасында нақты ұсыныстар қарастырылғанын атап өтті. Атап айтқанда, «Әділет» ресми жұмыспен қамтылған және әлеуметтік кепілдіктері бар 1 миллион сапалы жұмыс орнын құруды мақсат етеді. Экономиканы дамыту үшін орта бизнестің үлесін 20%-ға дейін арттыру, кәсіпкерлер үшін әкімшілік кедергілерді азайту және бизнестің қаржыландыруға қолжетімділігін кеңейту ұсынылады.
Бағдарламаның жеке бір бағыты отбасыларға арналған. Партия 2 жастан 6 жасқа дейінгі балаларды балабақшаға орналастыру кезегін толық жоюды, ал үш жасқа дейінгі балалары бар ата-аналар үшін жұмыспен қамтуды және табысты сақтай отырып, ыңғайлы жұмыс кестесін немесе қашықтан жұмыс істеу мүмкіндігін қарастыруды ұсынады. Сонымен қатар тұтынушылық кредит беру шарттарын әділеттірек ету, қосымша комиссияларды қысқарту және берешекті реттеудің түсінікті тетігін енгізу ұсынылады.
Құрылтай депутаттығына кандидат Ольга Перепечина және партияның сенімді өкілдері Вадим Мусин, Владимир Козлов, Тимур Айтуллин мен Рүстем Әлібеков ұжымға бағдарламаның осы және басқа да ережелерін таныстырып, қызметкерлердің сұрақтарына жауап берді. Сондай-ақ қала мен өңірді дамытуға қатысты ұсыныстар талқыланды.
«Адамдар өз мәселелері туралы айтқан кезде, жалпы сөздермен шектелмеу маңызды. Бүгінде кездесулерде көтеріліп жатқан көптеген мәселе біздің бағдарламамызда нақты шешімдермен қамтылған – жұмыс орындарын құру мен отбасыларды қолдаудан бастап, әлеуметтік қызметтердің қолжетімділігі мен қалалық ортаны дамытуға дейін. Сондықтан біз үшін бағдарламаны жай ғана таныстыру емес, ұсынылып отырған шаралардың адамдардың күнделікті өмірін нақты қалай өзгерте алатынын түсіндіру маңызды», – деді Ольга Перепечина.
Сонымен қатар бағдарламаның өзі азаматтардың сұраныстарын ескере отырып әзірленген. Оны дайындау кезінде цифрлық платформалар мен QR-кодтар арқылы тұрғындардың ұсыныстары жиналып, стратегиялық сессиялар мен әлеуметтік зерттеулер жүргізілді, сарапшылар мен бейінді мамандардың пікірлері талданды.
Петропавл тұрғындары «Әділет» партиясының «Есіктен есікке» акциясы мен мобильді үгіт топтарының жұмысы барысында аулаларды абаттандыру, жолдардың жағдайы, медициналық көмектің қолжетімділігі, отбасыларды қолдау және қалалық қызметтердің жұмысына қатысты мәселелерді көтерді.
Құрылтай депутаттығына кандидаттар Ольга Перепечина, Ульяна Ашимова, Елена Семидоцких және Айымгүл Әбілова күн бойы қала тұрғындарымен аулаларда, Қазақстан Конституциясы даңғылында және өтініштер қабылдау пунктінде кездесті. Тұрғындар мобильді топтың жанына тоқтап, өз үйлері немесе аудандарындағы мәселелер туралы айтып, үгіт шатырында партияның сайлауалды бағдарламасымен танысып, өтініш қалдырды.
Сұрақтардың басым бөлігі отбасыларға қатысты болды. Тұрғындар ата-аналарды қолдау, әлеуметтік қызметтердің қолжетімділігі және отбасының тұрмыстық әрі қаржылық қиындықтармен жалғыз қалмауына мүмкіндік беретін жағдайлар туралы сұрады. Кандидаттар партияның сайлауалды бағдарламасында бекітілген әлеуметтік ынтымақтастық пен атаулы қолдау қағидаты туралы айтып берді.
Қала тұрғындары медициналық көмектің қолжетімділігі мен сапасына да назар аударды. Сонымен қатар коммуналдық қызметтердің жұмысына және нақты үйлер мен көшелерге қатысты мәселелер көтерілді. Мұндай жағдайда кандидаттар өтініштерді тіркеп, олардың қайсысы жүйелі жұмысты қажет ететінін түсіндірді.
«Біз аулаларды аралап немесе көшеде адаммен сөйлескен кезде, ол бізге мемлекетті дамыту туралы абстрактілі түрде айтпайды. Ол: біздің аулаға балалар алаңы қажет, бұл жерде жол нашар, дәрігерге қаралу қиын, ал үйдің маңында жарықтандыру жеткіліксіз дейді. Үлкен күн тәртібі дәл осындай нақты мәселелерден қалыптасады. Сондықтан біз үшін бағдарламаны жай ғана таныстыру емес, оның ережелерінің адамдардың күнделікті өмірімен қалай байланысты екенін көрсету маңызды», – деді кандидат Елена Семидоцких.
Қазақстан Конституциясы даңғылындағы өтініштер қабылдау пунктінде кандидаттар мен штаб өкілдері азаматтарға күн сайын кеңес беріп, ұсыныстарын қабылдап, «Әділет» бағдарламасының жекелеген бағыттарын түсіндіреді.
«Біз адамдар күн сайын жүріп өтетін жерлерде әдейі жұмыс істейміз. Кездесуге немесе қоғамдық қабылдауға арнайы баруға кез келген адамның мүмкіндігі бола бермейді. Ал егер адам шатырды көріп, сұрағы болса, жай ғана келіп, сөйлесе алады. Біз үшін бағдарламаның қағаз жүзінде ғана емес, тұрғындармен тікелей әңгіме барысында да қолжетімді болғаны маңызды», – деді кандидат Ульяна Ашимова.
Атаулы жұмыс күн сайын жүргізіліп, тұрғындардың ұсыныстары кейінгі пысықтау үшін тіркеледі. Партия өкілдерінің айтуынша, мұндай формат тұрғындардың күнделікті сұраныстарын сайлауалды бағдарламаның бағыттарымен салыстырып, қай мәселелерге бірінші кезекте назар аудару керектігін анықтауға мүмкіндік береді.
Солтүстік Қазақстан облыстық көпбейінді ауруханасында «Әділет» партиясының өкілдері медицина қызметкерлерімен кездесу өткізді. Кездесу барысында медицина қызметкерлерінің мәртебесін арттыруға, еңбек жағдайларына және кәсіби даму мүмкіндіктеріне ерекше назар аударылды.
Құрылтай депутаттығына кандидат Калия Туренова және партияның сенімді өкілдері Юрий Белоног, Айгүл Нұрпейісова мен Мамадияр Байғұлов ұжымға «Әділет» партиясының денсаулық сақтау саласына қатысты сайлауалды бағдарламасының ережелерін таныстырды.
Партияның негізгі бағыттарының бірі – медицина мамандығының беделін арттыру және білікті маманның өз елінде кәсіби тұрғыда дамып, мансап құруына жағдай жасау.
Бағдарламада медицина қызметкерлерінің мәртебесін нығайту, еңбекақы төлеу жүйесін жетілдіру, мамандарды даярлау сапасын арттыру және олардың кәсіби өсуіне жағдай жасау қажеттілігі атап өтіледі. Бұл әсіресе жоғары жүктемемен, соның ішінде ауысымдық жұмыс режимінде еңбек ететін дәрігерлер мен орта медицина қызметкерлері үшін маңызды.
«Біз медициналық көмектің сапасын арттыру туралы айтып отырмыз, бірақ әрбір дәрігердің, мейірбикенің және басқа маманның артында күн сайын үлкен жауапкершілік арқалайтын адам тұр. Сондықтан медицина қызметкерінің мәртебесі соған сай болуы керек. Мамандар кәсіби өсу перспективасын көріп, лайықты еңбек жағдайларына ие болып, еңбегінің мемлекет пен қоғам тарапынан шынымен бағаланатынын түсінуі маңызды», – деді Құрылтай депутаттығына кандидат Калия Туренова.
Кездесуде кәсіби даму мәселелері де талқыланды. Партия өкілдері заманауи денсаулық сақтау жүйесі білім мен дағдыларды үнемі жаңартып отыруды талап ететінін, сондықтан медицина қызметкерлерінің оқып, біліктілігін арттыруына нақты мүмкіндік болуы керектігін атап өтті.
«Әділет» партиясының өкілдері шалғай елді мекендердің тұрғындарымен кездесулерін жалғастыруда. «Әділет» партиясынан Құрылтай депутаттығына кандидат Мұса Хайруллиев пен облыстық сайлауалды штаб мүшелері шалғай елді мекендерді аралау барысында Атырау облысы Исатай ауданындағы Айбас ауылына барды.
Сапардың негізгі мақсаты – ауыл тұрғындарымен тікелей жүздесіп, олардың ұсыныс-пікірлерін тыңдау және «Әділет» партиясының сайлауалды бағдарламасының негізгі бағыттарын таныстыру. Кездесуде тұрғындарға партияның экономикалық және әлеуметтік бағыттағы басымдықтары түсіндіріліп, елді мекеннің әлеуметтік-экономикалық дамуына қатысты өзекті мәселелер талқыланды.
«Айбас – аудан орталығынан шалғай орналасқанымен, ел өмірінен шет қалған ауыл емес. Мұнда да еңбек етіп, бала тәрбиелеп, ауылдың болашағына алаңдап отырған тұрғындар бар. Бүгін біз Айбасқа дайын жауаппен емес, халықтың өзінен мәселенің мәнін білу үшін келдік. Тұрғындар ауылдың тыныс-тіршілігін, шешімін күткен мәселелерін ашық айтты. Мұндай ұсыныстар – жай ғана пікір емес, алдағы жұмыстың нақты бағытын айқындайтын маңызды дүние. Шалғайдағы әр ауылдың дауысы естілуі керек, өйткені елдің дамуы орталықтан ғана емес, осындай ауылдардан басталады», – деді Мұса Хайруллиев.
Айбас ауылы орналасқан Исатай ауданының тарихы терең. Аудан 1928 жылы құрылған. 1990 жылы Құрманғазы және Махамбет аудандарының жер телімдерін қосу негізінде қайта құрылды. Бүгінде ауданның жалпы аумағы – 14,7 мың шаршы шақырым. Аудан орталығы – Аққыстау ауылы.
Ауыл-аймақты аралау барысында партия өкілдері әр елді мекеннің өзіндік ерекшелігі мен өзекті мәселелері бар екеніне назар аударды. Сондықтан жергілікті жердегі ахуалды көзбен көріп, тұрғындармен тікелей сөйлесу – сайлауалды жұмыстың маңызды бағыттарының бірі.
«Әділет» партиясы өкілдерінің пікірінше, шалғай елді мекендердің мәселесі де ел дамуының ортақ күн тәртібінен тыс қалмауы керек. Халықпен ашық диалог орнатуға бағытталған кездесулер сайлауалды науқан аясында жалғасып жатыр.