Қазақстанда жыл сайын 4 мыңға жуық адам өкпе обырына шалдығады, оның екі мыңы көз жұмады – ДСМ

Қазақстанда жыл сайын 4 мыңға жуық адамға өкпе обыры диагнозы қойылады. Дерт салдарынан жыл сайын шамамен 2 мың адам көз жұмады, деп хабарлайды Azattyq Rýhy.

Дәрігерлердің айтуынша, өлім-жітім көрсеткішінің жоғары болуына аурудың кеш анықталуы себеп болып отыр. Өкпе обыры алғашқы сатысында көп жағдайда ешқандай белгі бермейтіндіктен, науқастар дәрігерге кеш қаралады. Осыған байланысты елімізде 10-15 тамыз аралығында Өкпе обыры туралы ақпараттандыру апталығы өтеді.

Апта аясында тұрғындар онколог мамандардың кеңесін алып, қауіп тобына жататын азаматтар төмен дозалы компьютерлік томографиядан (КТ) тегін өте алады.

Тегін тексеруден:

• 50 жастан асқан, ұзақ жылдар бойы темекі шеккен азаматтар;
• темекіні тастаған бұрынғы шылымқорлар;
• зиянды өндіріс орындарында еңбек ететін қызметкерлер өте алады.

Ақпараттандыру апталығы 15 тамызда еліміздегі барлық онкологиялық орталықтарда ұйымдастырылатын Ашық есік күнімен қорытындыланады. Бұл күні тұрғындар дәрігерлердің қабылдауына жазылып, профилактикалық тексеруден өте алады.