Аталған жоба Қазақстандағы ең қарқынды көлік дәліздерінің бірін жаңғыртуға бағытталған
Алматы облысының Қарасай ауданындағы халықаралық маңызы бар «Алматы – Бішкек» автомобиль жолының 19-27 шақырым аралығын күрделі жөндеу және кеңейту жобасы ресми түрде басталды, деп хабарлайды Azattyq Rýhy.
Жоба мемлекет басшысының еліміздің заманауи көлік инфрақұрылымын дамыту жөніндегі тапсырмасын орындау аясында жүзеге асырылуда.
«Аталған жоба Қазақстандағы ең қарқынды көлік дәліздерінің бірін жаңғыртуға бағытталған. Бұл жолмен тәулігіне 70 мыңнан астам көлік қатынайды. Жобаны іске асыру Алматы қаласына кіріп-шығатын бағыттың өткізу қабілетін едәуір арттыруға, жол қозғалысы қауіпсіздігін күшейтуге және қала маңындағы елді мекендердің тұрғындарына, мегаполис қонақтарына әрі транзиттік көлікке қолайлы жағдай жасауға мүмкіндік береді», - делінген компания хабарламасында.
Салтанатты іс-шараға орталық және жергілікті атқарушы органдардың өкілдері, жол саласының басшылары, мердігер ұйымдар мен жұртшылық қатысты.
Қазіргі таңда қолданыстағы төрт жолақты автожол көлік ағынының артуына байланысты жүктемені толық көтере алмай отыр. Соның салдарынан тұрақты көлік кептелістері туындап, қозғалыстың орташа жылдамдығы төмендеп, жол-көлік оқиғаларының қаупі артып отыр.
Жоба аясында автожол төрт жолақтан сегіз жолаққа дейін кеңейтіледі. Нәтижесінде бұл учаске үздіксіз қозғалысты қамтамасыз ететін жалпы қалалық маңызы бар магистральдық көшенің талаптарына сәйкестендіріледі.
Күрделі жөндеу барысында:
Сонымен қатар жоба аясында газ құбырлары, су құбыры желілері, электрмен жабдықтау жүйелері және талшықты-оптикалық байланыс желілері сияқты инженерлік коммуникациялар көшіріледі.
«Жоба аяқталғаннан кейін Алматы мен қала маңындағы елді мекендер арасындағы жол жүру уақыты едәуір қысқарады. Мегаполиске кіреберістегі негізгі бағыттардың бірінің өткізу қабілеті артып, көлік жүктемесі азаяды, жол қозғалысы қауіпсіздігі күшейеді және жергілікті әрі транзиттік көлік үшін қолайлы жағдай қалыптасады. Бұл жоба халықаралық жол желісін кешенді жаңғырту жұмыстарының кезекті кезеңі әрі Қазақстандағы ең ірі қалалық агломерацияның көлік инфрақұрылымын дамытуға қосылған маңызды үлес болмақ», - деп жазады «ҚазАвтоЖол».