Қазақстан ауыл шаруашылығына арналған дрон шығаруды жоспарлап отыр

Қазақстанда ауыл шаруашылығына арналған дрондар мен автопилот жүйелерін шығару жолға қойылуы мүмкін. Бұл туралы Қытайдың Шанхай қаласында өткен Жасанды интеллект жөніндегі дүниежүзілік конференция (WAIC) аясында белгілі болды, деп хабарлайды Azattyq Rýhy.

Қазақстан Республикасының Премьер-Министрінің орынбасары – Жасанды интеллект және цифрлық даму министрі Жаслан Мәдиев Қытайдың Heilongjiang Huida Technology Co., Ltd. компаниясының негізін қалаушы Чжан Юймен келіссөз жүргізді. Кездесу қорытындысында тараптар, яғни министрлік, Freedom Holding Corp. және Huida Tech  арасында стратегиялық ынтымақтастық туралы меморандумға қол қойылды.

Жоспар бойынша, ауыл шаруашылығына арналған дрондар мен автопилот жүйелері Қазақстанда құрастырылатын болады. Сондай-ақ бірлескен ғылыми-зерттеу орталықтары құрылып, цифрлық агроөнеркәсіпке қажетті мамандар даярланады. Бұл Қазақстанның дайын өнімді импорттаудан гөрі, технологияны меңгеріп, өндірісті өз елінде дамытуға басымдық бере бастағанының көрінісі болмақ.

«Біз жай ғана техника жеткізуді талқылап отырған жоқпыз, біз индустрия құруды мақсат етіп отырмыз. Қазақстан өндірісті оқшаулау үшін барлық қажетті жағдайды, соның ішінде салықтық жеңілдіктер мен ауыл шаруашылығында озық жасанды интеллект шешімдерін енгізуге арналған реттеушілік құмсалғышты ұсынуға дайын. Біз қытайлық технологиялардың Қазақстанда бейімделіп, кейін Орталық Азия мен ЕАЭО нарығына шығуын қалаймыз», – деді Жаслан Мәдиев.

Министрліктің мәліметінше, жоба барысында Қазақстан үшін маңызды саналатын деректердің қауіпсіздігіне баса мән беріледі. Сонымен қатар қытайлық компания өз технологияларын елімізге енгізіп, отандық мамандармен тәжірибе алмасады. Компания жерсерік арқылы бағыт алатын ауыл шаруашылығы техникаларын, егістікке арналған дрондарды, топырақтың жай-күйін бақылайтын құрылғылар мен автоматты тамшылатып суару жүйелерін шығарады.