Су инспекцияларында 222 маман еңбек етеді
9 шілдеде Қазақстанда Су шаруашылығы қызметкерлері күні атап өтіледі. Бүгінде еліміздің су шаруашылығы саласында 29 мыңнан астам адам еңбек етеді. Оның ішінде 10,9 мыңнан астамы Су ресурстары және ирригация министрлігі жүйесінде жұмыс істейді, деп хабарлайды Azattyq Rýhy.
Атап айтқанда, министрліктің орталық аппаратында 176 қызметкер, Су шаруашылығы комитетінде 37 адам еңбек етеді. Ал Су ресурстарын реттеу, қорғау және пайдалану комитеті мен бассейндік су инспекцияларында 222 маман қызмет атқарады.
«Қазсушар» РМК-да 9889 адам, «Су ресурстарының ақпараттық-талдау орталығы» КЕАҚ-да 65 қызметкер жұмыс істейді. «Қазгидрогеология» ұлттық гидрогеологиялық қызметінде 368 маман, Қазақ су шаруашылығы ғылыми-зерттеу институтында 101 маман еңбек етеді. Сондай-ақ «SK Water Solutions» ЖШС-да 45 адам, өңірлік мемлекеттік мекемелерде 9 қызметкер жұмыс істейді.
Су ресурстары және ирригация министрі Нұржан Нұржігітов Қазақстанның су шаруашылығы саласы қызметкерлерін кәсіби мерекесімен құттықтады.
«Сіздердің ерен еңбектеріңіздің арқасында еліміздің су қауіпсіздігі қамтамасыз етіліп, ауыл шаруашылығы мен өнеркәсіп сияқты экономиканың маңызды салаларының тұрақты дамуына негіз қаланып отыр. Сіздер су тасқыны кезеңінде судың қауіпсіз өткізілуін, вегетация кезеңінде егістік алқаптарына судың тұрақты жеткізілуін және гидротехникалық нысандардың сенімді жұмысын қамтамасыз етіп келесіздер. Сіздердің еңбектеріңіз назардан тыс қалмайды. Министрлік алдағы уақытта да су саласы мамандарының мәртебесін арттыру бағытындағы жүйелі жұмыстарды жалғастыра береді»,– деді Су ресурстары және ирригация министрі Нұржан Нұржігітов.
Министрлік құрылған күннен бастап су шаруашылығы мамандарының мәртебесін көтеруге және олардың еңбек жағдайын жақсартуға ерекше көңіл бөліп келеді. Соңғы екі жарым жылда «Қазсушар» РМК қызметкерлерінің жалақысы орта есеппен екі есеге артты.
Бұдан бөлек, «Қазақстанның су шаруашылығы саласының еңбек сіңірген қайраткері» жаңа мемлекеттік наградасы тағайындалды.
Сала қызметкерлерін әлеуметтік қолдау шаралары да кезең-кезеңімен жүзеге асырылып жатыр. Мәселен, 2024 жылы су шаруашылығы мамандықтары алғаш рет «Дипломмен – ауылға!» мемлекеттік бағдарламасына енгізілді. Бүгінде «Қазсушардың» Жамбыл филиалының бірнеше маманы көтерме жәрдемақы алды. Ал былтыр саланың алты маманы «Наурыз жұмыскер» ипотекалық бағдарламасының қатысушысы атанды.
2025 жылы «Қазсушар» РМК филиалдарына 576 техника берілді. Бұған қоса, тариф қаражаты есебінен тағы 135 техника сатып алынды. Соның нәтижесінде кәсіпорынның техника паркі 27%-ға жаңартылды. Сондай-ақ «Қазсушардың» 435 маусымдық қызметкері тұрақты жұмыс орындарымен қамтамасыз етілді.
Павлодар облысының Май ауданындағы үш бұлақтың аумағында да акция ұйымдастырылды. Бұлақтар мен жағалау аумақтарын тазарту жұмыстарына 550-ге жуық адам қатысты. Олардың қатарында Су ресурстары және ирригация министрлігінің мамандары, «Қазсушар» РМК облыстық филиалы мен Ертіс бассейндік инспекциясының қызметкерлері, сондай-ақ жергілікті ақсақалдар, еріктілер мен студенттер болды.
Жалпы алғанда республикалық экологиялық акцияның екінші кезеңіне еліміз бойынша бір мезгілде 11 мыңнан астам адам қатысты.
«Мөлдір бұлақ» акциясының алғашқы кезеңі азаматтардың экологиялық мәдениетін қалыптастыруға елеулі үлес қосты. Еліміздің барлық өңірінің азаматтары бастамамызды белсенді қолдап, бұлақ көздерін ашу және қалпына келтіру, қоқыс тазалау, көшет отырғызу жұмыстарын өз күштерімен ұйымдастыра бастады. Әсіресе, жастардың белсенділігі қуантады. Сондай-ақ мұндай іс-шаралардың бастамашысы болып, жас ұрпаққа үлгі көрсетіп жүрген ақсақалдардың еңбегін ерекше атап өткен жөн», - деді Су ресурстары және ирригация министрі Нұржан Нұржігітов.
Еске сала кетейік, биыл 23 наурызда «Мөлдір бұлақ» экологиялық акциясының алғашқы кезеңі өтті. Ол Жамбыл, Қызылорда, Түркістан, Алматы, Жетісу облыстары мен Шымкент қаласында бір мезгілде ұйымдастырылып, 30 бұлақ пен 19 су айдынын қамтыды. Тазалау және абаттандыру жұмыстарына 9 мыңнан астам адам, оның ішінде 700-ден астам ерікті қатысты.
Сонымен қатар акция аясында Жамбыл облысында су саласындағы алғашқы еріктілер қозғалысы – «Болашақтың қайнары» құрылды. Оның басты мақсаты – жастардың экологиялық мәдениетін қалыптастыру және табиғатты қорғау ісіне белсенді тарту. Қозғалыс құрамына Тараз қаласындағы Қазақ ұлттық су шаруашылығы және ирригация университетінің студенттері енді. Қазіргі таңда «Болашақтың қайнары» еріктілер қозғалысы Қазақстанның өзге өңірлерінде де жасақталып, өз жұмысын бастады.