Ескі алаң былтыр желтоқсанда сүрілген
Ақтаудағы 13-шағынауданда орналасқан №19 үйдің тұрғындары жаңа балалар ойын алаңының құрылысы ұзаққа созылып кеткеніне шағымданды. Ескі алаң былтыр желтоқсанда сүрілгенімен, жаңасы әлі күнге дейін пайдалануға берілмеген, деп хабарлайды Azattyq Rýhy Lada.kz-ке сілтеме жасап.
Тұрғындардың айтуынша, бұрын балалар ойын алаңы орналасқан жер алты айдан астам уақыт бойы бос тұр.
Жазғы демалыс басталғанына қарамастан, балалардың ойнайтын орны әлі дайын емес.
Ақтау қаласы әкімдігінің мәліметінше, аталған нысан 80 балалар ойын алаңы мен 50 спорт алаңын орнату жобасы аясында салынып жатыр.
Жоба 2025 жылдан бері жүзеге асырылуда.
Әкімдік өткен жылдың желтоқсан айында №19 үйдің жанындағы ескі ойын алаңының сүрілгенін растады.
Мемлекеттік сатып алу қорытындысы бойынша мердігер ретінде «Болашақ-Өзен» ЖШС анықталған.
Қала әкімдігі құрылыс жұмыстарының мерзімі қыс мезгіліндегі қолайсыз ауа райына байланысты кейінге шегерілгенін мәлімдеді.
Осыған байланысты жұмыстар уақытша тоқтатылған.
Әкімдіктің мәліметінше, мердігер ұйым жақын күндері монтаж жұмыстарын қайта бастайды.
Жаңа балалар ойын алаңының құрылысын 2026 жылдың шілде айының соңына дейін аяқтау жоспарланып отыр.