Тоқаев Алатауды дамыту жөніндегі кеңесте Сингапур, Хайнань, Дубай қалаларынан үлгі алу керектігін айтты

Мемлекет басшысы Қасым-Жомарт Тоқаев Алатауды дамыту жөніндегі кеңесте Сингапур, Хайнань, Дубай қалаларын мысал етті, деп хабарлайды Azattyq Rýhy.

Президент отандық бизнес өкілдері қаланы дамытудың бел ортасында жүруі қажет екенін айтты.

«Маған бүгінде 50-ден астам инвестициялық жобадан тұратын пул жасақталғаны жөнінде мәлімдеді. Жалпы көлемі екі триллион теңгеге жуық қаржы құйылған бастамалар аясында 50 мыңнан аса жұмыс орны ашылады. Алдағы бір-екі жыл ішінде басым салаларға инвесторлар тарта отырып, аталған портфельді кеңейте түсуіміз керек. Әсіресе, отандық бизнесті ынталандыруға баса назар аударылғаны жөн. Бизнес өкілдері сырттан бақылаушы болмай, қаланы дамытудың бел ортасында жүруі қажет. Мұның маңызы зор. Өйткені, Шэньчжэнь секілді қалалардың тәжірибесі алғашқы онжылдықта шаһардың өркендеуіне жұмсалған инвестицияның басым бөлігін сыртқы емес, ішкі салымдар құрағанын көрсетіп отыр», – дейді президент.

Ол сөзін жалғай отырып, әлем елдеріндегі жағдайды мысалға келтірді.

«Шэньчжэнь, Хайнань, Дубай, Сингапур сияқты қалалардың бәрінде мемлекет алғашқы инвестор ретінде базалық инфрақұрылым қалыптастырып берді. Осылайша, бизнесте тәуекел азайып, тиісті жағдай жасалатын орнықты инвестициялық цикл іске қосылды», – дейді Қасым-Жомарт Тоқаев.