Қазір жарылысқа қатысты іс тергеліп жатыр
Ішкі істер министрінің орынбасары Санжар Әділов Мәжіліс кулуарында «Қазцинк» зауытындағы жарылысқа кінәлі адамдарға қатысты пікір білдірді, деп хабарлайды Azattyq Rýhy
Оның айтуынша, қазіргі таңда тергеу-жедел тобы құрылып, жұмысын бастаған. Бұл топты төтенше жағдайлар министрлігі үйлестіріп отыр.
«Бұған дейін айтқанымдай, тергеу-жедел тобы төтенше жағдайлар министрлігінің жетекшілігімен жұмыс істейді. Сондықтан басқа органның атынан түсініктеме беру мен үшін орынсыз болар еді», – деді ол.
Әділовтің мәліметінше, Қылмыстық кодекстің 156-бабы 4-бөлігі бойынша қылмыстық іс қозғалған. Бұл бап 7 жылға дейін бас бостандығынан айыру жазасын көздейді.
Тергеу-жедел тобы тәжірибелі мамандардан жасақталған. Қазіргі уақытта 10-нан астам сот сараптамасы тағайындалған. Негізгі сараптаманың бірі – жарылыстың себебін анықтау. Техногендік процестің қатесі мен адам факторы, яғни еңбекті қорғау және қауіпсіздік ережелерін бұзу факторлары әзірге жарылысқа себеп болуы мүмкін екі нұсқа ретінде қарастырылып отыр.
«Бұл – негізгі екі нұсқа. Қазіргі уақытта тиісті мемлекеттік органдардың, соның ішінде өнеркәсіп саласына жауапты министрліктердің мамандары жұмыс істеп жатыр. Сараптамалар мен комиссия қорытындылары тергеуге нақты бағыт береді», – деді ол.