Қазақстанда дауылды ескерту: жел күшейіп, найзағай ойнайды

Қазақстанның бірқатар өңірінде 21 сәуірге дауылды ескерту жарияланды, деп хабарлайды Azattyq Rýhy.

Синоптиктердің болжамынша, ел аумағында жаңбыр, найзағай, тұман және екпінді жел қатар жүреді.

Жамбыл облысында таңертең және күндіз батыс, оңтүстік және таулы аймақтарда жауын-шашын мен найзағай күтіледі. Таулы өңірлерде тұман түсіп, оңтүстік-батыстан соққан желдің жылдамдығы кей жерлерде 15–20 м/с-қа жетеді, ал күндіз екпіні 25 м/с-қа дейін күшейеді. Облыстың батысында өрт қаупі жоғары. Таразда желдің екпіні 15–23 м/с болады.

Жетісу облысында күндіз Алакөл маңында жел 15–20 м/с-қа дейін күшейеді. Ақтөбе облысының оңтүстігі мен шығысында жаңбыр мен найзағай болжанса, солтүстігінде батыс желі 15 м/с-қа дейін жетеді.

Алматы облысының шығыс, орталық және таулы бөліктерінде де жел күшейіп, екпіні 15–20 м/с болады. Қонаев қаласы мен Алматының таулы аймақтарында осындай ауа райы сақталады.

Маңғыстау облысында күндіз батыс, оңтүстік және орталық аудандарда жаңбыр мен найзағай күтіледі. Түнде солтүстік-шығыста желдің жылдамдығы 15–18 м/с-қа дейін артады. Ақтауда да күндіз жауын-шашын болады.

Батыс Қазақстан облысында түнде және таңертең тұман түсіп, күндіз жел 15–20 м/с-қа дейін күшейеді. Орал қаласында да осындай жағдай сақталады.

Солтүстік Қазақстан облысында күндіз батыс пен солтүстікте жаңбыр мен найзағай болжанады, ал түнде және таңертең шығыста тұман түседі. Петропавлда күндіз жауын-шашын күтіледі.

Түркістан облысында оңтүстік және таулы аймақтарда жаңбыр, найзағай және бұршақ болуы мүмкін. Кей жерлерде өрт қаупі өте жоғары деңгейде сақталады. Шымкент пен Түркістан қалаларында да жел күшейеді.

Қызылорда облысында түнде солтүстік және орталық аудандарда жаңбыр мен найзағай болуы ықтимал. Қостанай облысында күндіз бірнеше ауданда жауын-шашын мен найзағай күтіліп, облыс орталығында да жаңбыр жауады.

Синоптиктер тұрғындарға ауа райының күрт өзгеруіне байланысты сақтық шараларын күшейтуді ескертеді.